Niderlandiya hukumati 2024-yil 1-yanvaridan maktab o‘quvchilariga maxsus sabablarsiz darslarga mobil telefon olib kirishni taqiqlamoqchi. Talab qonuniy hujjat emas, balki ko'rsatma shaklida belgilanadi.
Rasmiylarga ko‘ra, sinfdagi mobil telefonlar, planshetlar va aqlli soatlar o‘quvchilarni chalg‘itadi, bu esa ularning akademik ko‘rsatkichlari uchun yomon, deb yozadi Algemeen Dagblad nashri. Elektron uskunalardan faqat darsda foydalanish uchun zarur bo'lganda va tibbiy sabablarga ko'ra ruxsat beriladi.
“Mobil telefonlar hayotimiz bilan chambarchas bog'liq bo'lishiga qaramay, sinfda ularga o'rin yo'q. O‘quvchilar diqqatini jamlay olishi va yaxshi o'qish imkoniyatiga ega bo'lishi kerak. Ilmiy tadqiqotlar shuni ko‘rsatadiki, mobil telefonlar bunga xalaqit qiladi”, — dedi Niderlandiya ta’lim vaziri Robbert Deykgraaff.
Unga ko‘ra, ta’qiqga qanday amal qilishni maktablarning o‘zlari hal qiladi. Shu bilan birga, agar 2024-yilning yoziga qadar taqiq bo‘yicha harakatlar natija bermasa, qonuniy choralar ko'riladi.
Izoh (0)