O‘zbekiston banklari may oyida 798 milliard so‘m sof foyda ko‘rdi. Bu banklarning oylik foydasi bo‘yicha oxirgi 6 oydagi eng past ko‘rsatkichdir, deb yozadi Telegram’dagi “Bankir” kanali.
Xabar qilinishicha, so‘nggi bor banklar 2022-yilning noyabr oyida hozirgidan kamroq foyda olgan — 724 milliard so‘m. May oyiga qadar tizimga bo‘lgan talabning keskin oshishi natijasida mamlakatdagi banklar oyiga trillion so‘m atrofida foyda olayotgan edi.
Banklar 2023-yilning 5 oyida jami 50,3 trillion so‘m daromad olgan. Bunda sof foyda 4,8 trillion so‘mni tashkil qilgan. Daromad 2022-yilning mos davriga nisbatan 29,9 foizga, foydasi esa 40,4 foizga oshgan.
Ta’kidlanishicha, solishtirilayotgan davrda foizsiz daromadlar 23,2 foizga oshganiga qaramasdan, foizli daromadlar ham 34,3 foizga ko‘paygan. Bu banklar xizmat ko‘rsatishdan ko‘ra ko‘proq kreditlash orqali daromad olishda davom etayotganini anglatadi.
- Yanvar—may oylari davomida 1,3 trillion so‘m foyda solig‘i to‘langan.
- Bu davrda 6,9 trillion so‘mlik operatsion xarajatlar (xodimlarga oylik va boshqalar) ham amalga oshirilgan.
Izoh (0)