Polsha Daniya bosh vaziri Mette Frederiksenning NATOning yangi bosh kotibi etib tayinlanishiga qarshi, deb yozadi The Wall Street Journal o‘z nomini oshkor etmagan Yevropa rasmiylariga tayanib.
Unga ko‘ra, Varshava alyansga NATOning sharqiy qanotidagi siyosatchi rahbarlik qilishini istaydi, shuningdek, Daniya mudofaa xarajatlari bo‘yicha o‘z majburiyatlarini hanuzgacha bajarmaganini ma'lum qilmoqda.
Boshqa davlatlar, jumladan, Fransiya va Litva hali kimni qo‘llab-quvvatlashga qaror qilgani yo‘q.
Nashrning yozishicha, Polsha, Rossiyaga yaqin joylashgan boshqa davlatlar qatori, NATOga “bir paytlar Sovet Ittifoqi tarkibiga kirgan mamlakatning fuqarosini Bosh kotib lavozimiga tayinlash orqali Moskvaga kuchli signal beriladi”, deb hisoblaydi.
Shu nuqtayi nazardan, bir qancha davlatlar Estoniya Bosh vaziri Kay Kallas nomzodini ilgari surgan. Biroq, g‘arbiy qismda joylashgan ba'zi davlatlar sharqiy qanotdan bosh kotibning tayinlanishi “juda provokatsion bo‘ladi, chunki bu alyans rahbariyatini Rossiya ostonasiga keltirib qo‘yadi” deb hisoblashmoqda.
Izoh (0)