Президент фармони билан айрим норматив-ҳуқуқий ҳужжатларга ўзгартириш ва қўшимчалар киритилди, деб хабар беради Telegram’даги “Ҳуқуқий ахборот” канали.
Киритилган қўшимчага кўра, Қорақалпоғистон Республикасида доимий яшайдиган ҳамда умумий ўрта, ўрта махсус ва профессионал таълим ташкилотларини тамомлаган ёшлар учун 2023/2024-ўқув йилида давлат гранти асосида қўшимча 3 000 та ўрин ажратилади.
Бунда соҳа ва тармоқларнинг олий маълумотли кадрларга бўлган эҳтиёжи аниқланиб, олий таълим муассасалари ва таълим йўналишлари кесимидаги таклифлар Ўзбекистон таълим ташкилотларига қабул қилиш бўйича давлат комиссиясига 2023 йил 20 июлгача тақдим этилади.
Куни кеча Олий таълим, фан ва инновациялар вазирлиги ОТМлари бакалавриат таълим йўналишларига қабул бўйича аризалар статистикасини эълон қилганди. Унга кўра, 3 июль соат 09:00 ҳолатига 129 минг 863 нафар абитуриент онлайн рўйхатдан ўтган. Шундан кундузги таълим учун 86 минг 601 нафар, сиртқи таълимга 38 минг 494 нафар, кечкига 3 минг 469 нафар, масофавийга 1 минг 298 нафар абитуриент рўйхатдан ўтган.
Жорий ўқув йилида давлат ОТМларига жами 206 минг 857 нафар абитуриент ўқишга қабул қилинади. Шундан 43 минг 783 нафари грант, 163 минг 74 нафари тўлов-контракт асосида ўқийди. Бакалавриатга (кундузги) ўтган йилгига нисбатан грантлар сони 10 фоизга, контракт 1 фоизга оширилган.
Изоҳ (0)