Rossiya prezidenti Vladimir Putin Nyu-Dehlida bo‘lib o‘tgan Shanxay Hamkorlik Tashkiloti sammitida videoaloqa orqali so‘zlagan nutqida “Vagner” isyoni paytida Rossiyani qo‘llab-quvvatlagani uchun tashkilotga a’zo mamlakatlarga minnatdorlik bildirdi.
“Rossiya tashqi bosim, sanksiyalar va provokatsiyalarga ishonch bilan qarshilik ko‘rsatib keldi va qarshilik ko‘rsatishda davom etadi. Hozirgi vaziyatda ham mamlakatimiz barqaror rivojlanishda davom etmoqda. Rus xalqi har qachongidan ham jipslashdi. Rossiya siyosiy doiralarining, butun jamiyatning birdamligi va vatan taqdiri uchun yuksak mas’uliyati qurolli isyonga urinishlarga qarshi birlashgan front sifatida yaqqol namoyon bo‘ldi. Fursatdan foydalanib, Rossiya rahbariyatining konstitutsiyaviy tuzum, fuqarolar hayoti va xavfsizligini himoya qilish borasidagi harakatlarini qo‘llab-quvvatlashini bildirgan SHHT davlatlaridan kelgan hamkasblarimga minnatdorlik bildirmoqchiman. Biz buni yuksak qadrlaymiz”, – dedi Rossiya prezidenti.
Vladimir Putinning ta’kidlashicha, hozir Rossiyaga nisbatan misli ko‘rilmagan miqyosdagi sanksiyalar joriy qilingan. Uning fikricha, bu cheklovlar noqonuniydir.
Shu bilan birga, Putin SHHT xalqaro huquq va suveren davlatlar o‘rtasidagi o‘zaro hurmatga asoslangan hamkorlik tamoyillariga asoslangan “haqiqatan ham adolatli dunyo tartibini” shakllantirish tarafdori ekanini ta’kidladi.
Nyu-Dehli shahrida SHHT davlatlari rahbarlari kengashining 23-sammiti virtual formatda bo‘lib o‘tmoqda. Uchrashuvda Eron SHHTga to‘liq qabul qilindi. Shuningdek, tashkilotga aʼzo davlatlar sammit davomida Belarusning tashkilotga aʼzo bo‘lish istagi to‘g‘risidagi memorandumni rasmiylashtirishi rejalashtirilgan. Hozirga qadar SHHT tarkibiga sakkizta davlat kirar edi: Rossiya, Hindiston, Qozog‘iston, Qirg‘iziston, Xitoy, Pokiston, Tojikiston va O‘zbekiston.
Izoh (0)