Ўзбекистон Энергетика вазирлиги давлат компанияларида амалга оширилган тайинловлар “Ўзбекнефтгаз”, UzGasTrade ва “Иссиқлик электр станциялари” компанияларига янги раҳбарлар тайинланганини маълум қилди.
Жўраев Баҳодир Ибрагимович — “Иссиқлик электр станциялари” АЖ бошқаруви раиси этиб тайинланди. Жўраев бунга қадар “Иссиқлик электр станциялари” АЖ бошқаруви раиси вазифасини бажарувчи сифатида фаолият юритиб келаётганди.
Исақулов Сардор Дадажонович — “Иссиқлик электр станциялари” АЖ бошқаруви раисининг биринчи ўринбосари лавозимига тайинланди. Исақулов бунга қадар Энергетика вазирлигининг Марказий диспетчерлик бошқармаси бошлиғи лавозимида фаолият юритган.
Навбатдаги тайинлов, Сидиқов Баҳодиржон Баҳромович — “Ўзбекнефтгаз” АЖ бошқаруви раиси этиб тайинланди. Сидиқов бунга қадар “Ўзбекнефтгаз” бошқаруви раиси вазифасини бажарувчи сифатида фаолият юритиб келаётганди.
Сидиқов 2017-2018 йилларда мазкур компанияда раис ўринбосари, 2019 февралидан 2020 йил январигача компания раиси сифатида ишлаган. “Ўзбекнефтгаз”га қайтишидан олдин Олмалик кон-металлургия комбинати “Ёшлик” конини ўзлаштириш бўйича лойиҳа офиси раҳбари лавозимида фаолият юритган.
Шу билан бирга, "Шеров Рустам Чўлиевич “Ўзбекнефтгаз” АЖ Бошқаруви раисининг Геология ва қазиб чиқариш бўйича ўринбосари лавозимига тайинланди. Шеров шу кунгача “Ўзбекнефтгаз” АЖ бошқаруви раисининг Қазиб чиқариш ва қайта ишлаш бўйича ўринбосари лавозимида ишлаган.
Шунингфек, Темиров Одил Шукурович “Ўзбекнефтгаз” АЖ бошқаруви раисининг Қайта ишлаш бўйича ўринбосари лавозимига тайинланди. Тайинловга қадар у “Ўзкимёсаноат” АЖ Бошқарув раисининг ишлаб чиқариш, маҳаллийлаштириш, саноатда кооперация алоқаларини кенгайтириш ва ахборот технологиялари бўйича биринчи ўринбосари лавозимида ишлаган.
Агзамов Алишер Тоҳирович — UzGasTrade АЖ бошқаруви раиси лавозимига тайинланди. Агзамов бунга қадар UzGasTrade АЖ Табиий газни харид қилиш бошқармаси бошлиғи лавозимида фаолият юритиб келаётган эди.
Бугун, 4 июль куни “Ўзбекнефтгаз” АЖ берган расмий хабарга кўра, компания матбуот хизматига янги раҳбар тайинланган.
Ибодов Мўмин Мамуржонович “Ўзбекнефтгаз” АЖ бошқарув раисининг ахборот сиёсати масалалари бўйича маслаҳатчиси – матбуот котиби вазифасини бажарувчи этиб тайинланди.
Тайинловга қадар Ибодов Президент администрацияси, Олий Мажлис Сенати, Давлат активларини бошқариш агентлиги, Олий ва ўрта махсус таълим вазирлигида ахборот сиёсати масалалари бўйича фаолият олиб борган.
Изоҳ (0)