Ko‘plab mashhurlar karyerasining boshida rol uchun har qanday shartga rozi bo‘ladi. Ular rejissorning talablarini sidqidildan bajaradi. Asta-sekin aktyorlar tajriba orttiradi va nafaqat ssenariyga o‘zgartirish kiritish, balki tashqi ko‘rinishini o‘zgartirishdan ham bosh tortishga jur’at etishadi.
Kerri Fisher — “Yulduzlar jangi. IV epizod: Yangi umid”
Qahramoni malika Leya singari Kerri Fisher ham temperamentli va isyonkor edi. “Yulduzlar jangi” filmini suratga olishdan oldin aktrisaga 5 kg vazn yo‘qotishi kerakligi aytiladi, buning uchun “ozish lageri”ga yuboriladi. Ammo qiz ishdan bo‘shatishlaridan qo‘rqsa-da, ozishni xayoliga ham keltirmaydi. Yaxshiyamki, u loyihadan chetlashtirilmaydi va uning ijrosidagi Leya obrazi barcha davrlarning eng yaxshi film qahramonlari ro‘yxatiga kiradi.
Kirsten Danst — “O‘rgimchak odam”
Franshiza prodyuserlaridan biri Kirsten roli uchun beg‘ubor tabassumga ega bo‘lishini ta’kidlaydi. Biroq aktrisa o‘zining nomukammal tishlaridan mamnun bo‘lib, ularni tuzatmoqchi emasdi. Oxir-oqibat aktrisaning tabassumi faqat film posterida tahrirlangan — kadrda o‘zining tabiiy shaklida qolgan.
Alan Rikman — “Garri Potter va tilsim shahzoda”
“Garri Potter va tilsim shahzoda”da Severus Sneyp Drakoni to‘xtatib, Dambldorni o‘zi o‘ldiradigan sahna bor. Rasmiy ssenariyda aktyor “Men so‘z berganman, qasam ichganman” deyishi kerak edi. Unda Sneypning Drako Malfoyning onasiga uning o‘g‘liga g‘amxo‘rlik qilishga va’da bergani haqida so‘z boradi.
Biroq Alan Rikman bu iborani aytishdan bosh tortadi, chunki uning fikricha, bu hamma narsani chalkashtirib yuborardi. Buning o‘rniga Sneyp jim bo‘lib qoladi va ikki so‘zni aytadi: “Avada Kedavra”.
Jenna Ortega — “Uenzdey”
Jenna Uenzdey roliga shunchalik kirishib ketadiki, hatto mustaqil ravishda ba’zi dialoglarga tuzatishlar kiritadi. Misol uchun, Quzg‘unlar baliga kiyish uchun Qo‘l Uenzdeyga hashamatli qora ko‘ylak sovg‘a qilib, hayratda qoldiradi. Uenzdey kiyimni ko‘rganda “O, Xudoyim, bu ko‘ylak judayam chiroyli, buning uchun o‘zimdan nafratlanaman!” deyishi kerak edi. Biroq aktrisa bu jumla uning xarakteri uchun g‘ayritabiiyligini his qiladi va buni aytmaslikka qaror qiladi.
Deniel Kreyg — Jeyms Bond haqidagi filmlar
2021-yilda Kreyg Bond filmidagi ishtirokini rasman yakunladi. Shunga qaramay, uning ramziy 007 obrazi hali ham qizg‘in bahs-munozaralarga sabab bo‘lmoqda. Aktyor sochining rangi eng ko‘p muhokama qilinadi, chunki Bondning oldingi barcha ijrochilari qorasoch edi. Kreyg sochlarini bo‘yashdan bosh tortadi. Buning o‘rniga u shiddatli ko‘rinish uchun kalta soch turmagini taklif qiladi.
Kira Naytli — “Gersoginya”
“Gersoginya” dramasida Kira Naytli haqiqiy tarixiy shaxs — gersoginya Jorjiya Kavendish rolini o‘ynaydi. Film ijodkorlari film posterlarida aktrisaning qomatini ko‘zga tashlanarli qilish taklifini berishadi, ammo Kira qomatini fotoshop qilishni qat’iyan man qiladi.
Imelda Stonton — “Garri Potter va qaqnus ordeni”
Dolores Ambrij obrazini gavdalantirgan Imelda Stonton maxsus qoplamalardan foydalanishni xohlaydi. U qahramoni yumshoqfe’l, mukammal qad-qomatdan xoli bo‘lishi kerakligini his qiladi. Axir, Ambrij uchun tashqi tomondan yumshoq va mehribon ko‘rinishi muhim edi, shu yo‘l bilan u shafqatsiz va amalparast ekanini yashirardi.
“Garri Potter va qaqnus ordeni” filmining libos dizaynerlari uning iltimosini hech qanday tortishuvsiz qondiradilar. Bel sohasidagi qo‘shimcha hajm tufayli aktrisaning yurishi o‘rdakka o‘xshab qoladi. Imelda esa bundan mamnun bo‘ladi.
Jin Xekman — “Supermen”
1978-yilda suratga olingan “Supermen” filmidagi Leks Lyutor roli uchun Jin Xekmandan sochini oldirishni so‘rashganda, aktyor qat’iyan rad etgan. Keyin kino ijodkorlari Xekman qahramonining parik kiyishi haqidagi illyuziya yaratishga qaror qilishadi. Ular film davomida uning sochlarini turli usullar bilan turmaklashadi. Aktyor faqat bitta sahnada kal bo‘lib ko‘rinadi, ammo buning uchun u sochini olishi shart emasdi: vizajistlar buni qoyilmaqom tarzda uddalashgan.
Izoh (0)