Аксарият абитуриентларга қайси университетга кириш ёки қанақа йўналишда ўқишнинг аҳамияти йўқ. Бу ҳақда Олий таълим, фан ва инновациялар вазирлиги департамент бошлиғи Абдували Холиқов “Дарё”га берган интервьюсида маълум қилди. “Ўқишга эртани ўйлаб кириш керак”, дейди мутахассис.
Абдували Холиқовнинг айтишича, ҳозирда 86 фоиз атрофидаги битирувчилар ўзи ўқиган соҳаси бўйича ишлаяпти.
“Лекин 14 фоиз ҳам кўп. Жорий йил 150 минг талаба ўқишни битиради. Бу улар орасидан 21 минг нафари ўзи ўқиган йўналишда ишламайди дегани. Ўша 21 минг бола ёки иккинчи мутахассисликка топширади, ёки бошқа вариант излайди. Бу ерда йўналишларни бозор ва талабгор белгилаб бериши керак. Агар бизда қайсидир йўналишларга абитуриентлар сони кам бўлса ёки улар тўлмаса, ўша йўналишга эҳтиёж йўқ дегани. Лекин бунинг учун абитуриентларда касбга йўналиш фикри бўлиши керак. Бугун тан олишимиз керак, аксарият абитуриентларга қайси ОТМга кириш ва қанақа йўналишда ўқишнинг аҳамияти йўқ. Ўқишга эртани ўйлаб кириш керак. Ўшандагина биз қайси йўналишларни ёпиб, қабулни тўхтатишимиз кераклиги, қайси йўналишларга талаб кўп, квотани оширишимиз кераклигини аниқ биламиз. Ўзини активлигини йўқотган йўналишлар фаолиятини тўхтатиш керак. Меҳнат бозори учун янги йўналишларни шакллантириш лозим. Ва биз бу бўйича ишлаяпмиз” — деди вазирлик вакили.
Абдували Холиқовнинг қўшимча қилишича, ҳозирда ОТМ битирувчиларини камида иккита соҳада ишлайдиган мутахассис қилиб етиштириш бошланган.
“Мақсадимиз таълим йўналишлари сонини камайтириб, дипломда квалификация беришни кўпайтириш. Яъни битирувчиларни камида иккита соҳада ишлайдиган мутахассис қилиб етиштиришимиз керак. Бу жараён бошланган. Масалан, Жаҳон тиллари университетининг испан тили йўналишида ўқиган битирувчини дипломига испан тили мутахассиси деб ёзиб бериларди. У қишлоғига боради, лекин бирор жойда испан тили йўқлиги учун ишлай олмасди. Бугун эса испан тилини тугатганларга айтайлик, иккинчи тил сифатида инглиз тили ўқитилган бўлса, инглиз тили мутахассислигини қўшиб ёзиб беряпмиз. Боряпти, испан тили йўқми, инглиз тилидан дарсини беряпти. Бунга 4 йил бўлди” — деди у.
Абдували Холиқовга кўра, ҳозир бу жараён бошқа соҳаларда ҳам кенгайтирилмоқда. Масалан, муҳандислик соҳасида, педагогикада математика информатика билан бирлаштирилган.
“Мактабда дарс соатлари кам бўлгани учун ўқитувчи ҳам математика, ҳам информатикадан дарс берсин деб, йўналишни математика ва информатика қилдик. Ёки бўлмаса, физика-астрономия бирлашди. Бу секин-аста оптималлашиб боряпти. Битирувчининг ишлаш имконияти кенгроқ бўлиши керак” — деди мутахассис.
Изоҳ (0)