Surxondaryo viloyati Qumqo‘rg‘on tumanida hokim tashrifidan so‘ng yo‘l ta‘mirlash ishlari to‘xtatilgani haqida xabarlar tarqaldi. Viloyat hokimligi holat bo‘yicha bayonot berdi.
Unga ko‘ra, Xalq deputatlari viloyat kengashining 2023-yil 17-iyundagi qarori bilan tasdiqlangan “Surxondaryo viloyati mahallalaridagi birinchi navbatda amalga oshiriladigan chora-tadbirlar” dasturida shahar va tumanlarda ichki yo‘llari taʼmirlanadigan mahallalar ro‘yxati va asfaltlanadigan yo‘llar masofasi belgilangan.
Mazkur dasturga asosan, Qumqo‘rg‘on tumanidagi mahallalarning infratuzilmasini rivojlantirish maqsadida ichki yo‘llarni taʼmirlash, ichimlik va oqava suv tarmoqlari tortish, elektr energiyasi taʼminotini yaxshilash uchun 18 milliard 754 million so‘m mablag‘ ajratilgan.
Shundan, “Besh qahramon” mahallasi ichki yo‘llarining 4 kilometr 309 metr qismini asfaltlash uchun 1 milliard 970 million so‘m mablag‘ ajratilgan bo‘lib, hozir loyihaning 30 foizi, yaʼni 591 million so‘mi moliyalashtirilgan. Videomurojaatda ko‘rsatilgan joy mahallaning Dilnavo ko‘chasi bo‘lib, uning 1 kilometr qismi asfalt yotqizish uchun tayyor holga keltirilgan. Kecha viloyat hokimining ushbu mahallaga tashrifi vaqtida ko‘chaning taʼmirlangan qismida seminar o‘tkazilib, qolgan yo‘llarni ham shu tartibda toshlash va taʼmirlash hamda asfaltlashga tayyorlash bo‘yicha ko‘rsatmalar berilgan.
Shundan so‘ng, maxsus texnikalar va yo‘l quruvchi ishchilar Dilnavo ko‘chasining taʼmirlanmagan qismida ishlarni davom ettirish uchun ketishgan. Hozir ushbu ko‘chada taʼmirlash ishlari davom ettirilmoqda. Toshlash ishlari yakunlangach, taʼmirlangan yo‘lga asfalt yotqizish boshlanadi.
Izoh (0)