Сурхондарё вилояти Қумқўрғон туманида ҳоким ташрифидан сўнг йўл таъмирлаш ишлари тўхтатилгани ҳақида хабарлар тарқалди. Вилоят ҳокимлиги ҳолат бўйича баёнот берди.
Унга кўра, Халқ депутатлари вилоят кенгашининг 2023 йил 17 июндаги қарори билан тасдиқланган “Сурхондарё вилояти маҳаллаларидаги биринчи навбатда амалга ошириладиган чора-тадбирлар” дастурида шаҳар ва туманларда ички йўллари таъмирланадиган маҳаллалар рўйхати ва асфалтланадиган йўллар масофаси белгиланган.
Мазкур дастурга асосан, Қумқўрғон туманидаги маҳаллаларнинг инфратузилмасини ривожлантириш мақсадида ички йўлларни таъмирлаш, ичимлик ва оқава сув тармоқлари тортиш, электр энергияси таъминотини яхшилаш учун 18 миллиард 754 миллион сўм маблағ ажратилган.
Шундан, “Беш қаҳрамон” маҳалласи ички йўлларининг 4 километр 309 метр қисмини асфалтлаш учун 1 миллиард 970 миллион сўм маблағ ажратилган бўлиб, ҳозир лойиҳанинг 30 фоизи, яъни 591 миллион сўми молиялаштирилган. Видеомурожаатда кўрсатилган жой маҳалланинг Дилнаво кўчаси бўлиб, унинг 1 километр қисми асфалт ётқизиш учун тайёр ҳолга келтирилган. Кеча вилоят ҳокимининг ушбу маҳаллага ташрифи вақтида кўчанинг таъмирланган қисмида семинар ўтказилиб, қолган йўлларни ҳам шу тартибда тошлаш ва таъмирлаш ҳамда асфалтлашга тайёрлаш бўйича кўрсатмалар берилган.
Шундан сўнг, махсус техникалар ва йўл қурувчи ишчилар Дилнаво кўчасининг таъмирланмаган қисмида ишларни давом эттириш учун кетишган. Ҳозир ушбу кўчада таъмирлаш ишлари давом эттирилмоқда. Тошлаш ишлари якунлангач, таъмирланган йўлга асфалт ётқизиш бошланади.
Изоҳ (0)