Navoiy va Xorazmda zaxiradagi yerni noqonuniy sotmoqchi bo‘lganlar qo‘lga tushdi

Navoiy viloyatining Xatirchi tumani, Xorazm viloyatining Urganch tumanida zaxiradagi yer maydonlari noqonuniy sotilishining oldi olindi.

Bosh prokuratura huzuridagi departamentning Xatirchi tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda fuqaro F.E. va boshqalar “Tinchlik” MFYda joylashgan zaxiradagi tomorqa yer maydonini fuqaro N.T.ga firibgarlik yo‘li bilan 400 million so‘mga sotishga kelishib, shundan 250 million so‘mni olgan vaqtida ashyoviy dalillar bilan ushlangan.

Shu kabi, departamentning Urganch tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqaro V.R. tuman hududidagi 6 sotix zaxiradagi yer maydonini fuqaro B.B.ga firibgarlik yo‘li bilan 300 million so‘mga sotishga kelishib, shundan 4 500 dollar va 5 million so‘mni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish ) bilan jinoyat ishlari qo‘zg‘atilib, tergov harakatlari o‘tkazilmoqda.