Toshkent shahrida bugun “26-iyun - Xalqaro giyohvand moddalarni suiisteʼmoli va noqonuniy aylanishiga qarshi kurashish” kuni munosabati bilan Davlat xavfsizlik xizmati tomonidan musodara qilingan giyohvandlik vositalarini yo‘q qilish tadbiri bo‘lib o‘tdi. Bu haqda “Daryo” muxbiri xabar bermoqda.
Tadbirda O‘zbekiston Narkotik moddalarni nazorat qilish milliy axborot-tahlil markazi bergan maʼlumotga ko‘ra, 2022-yil davomida O‘zbekiston hududida giyohvandlik vositalari, psixotrop moddalar va prekursorlarning noqonuniy muomalasi bilan bog‘liq jinoyatlar sodir etgani uchun 96 ta holatlar bo‘yicha xorijiy davlatlarning 99 nafar fuqarosi hibsga olingan. Jumladan, 12 nafar Afg‘oniston, 32 nafar Tojikiston, 25 nafar Qirg‘iziston, 14 nafar Qozog‘iston, 8 nafar Rossiya, 5 nafar Turkiya, 1 nafar Fransiya, 1 nafar AQSH va 1 nafar Belarus fuqarolaridir.
Ulardan 539,3 kg giyohvandlik vositalari va 1921 dona psixotrop moddalar hamda 7928 dona kuchli taʼsir qiluvchi dori prepraratlari musodara qilingan. Misol uchun:
- Yanvar oyida Toshkent viloyatining Toshkent tumanida 3 nafar Tojikiston fuqarosi va ikki nafar Yuqori Chirchiq tumanida yashovchi shaxslar qo‘lga olingan. Ulardan 35 kg 542,9 gr. opiy va 28 kg 627,05 gr gashish giyohvandlik vositalari musodara qilingan. Mazkur holat bo‘yicha, yana bir nafar Turkiya fuqarosi gumondor sifatida Toshkent shahrining Uchtepa tumanida qo‘lga olingan.
- Yanvar kuni Toshkent viloyatining Olmaliq shahrida O‘zbekiston chegarasini aylanma yo‘l bilan kesib o‘tib, Olmaliqdagi ikkita yashirin joyga 10 kg 701,5 gr gashish giyohvandlik vositasini ko‘mgan Tojikiston fuqarosi qo‘lga olingan.
- Fevral oyida Rossiya fuqarosi boshqaruvida bo‘lgan Tojikiston – Rossiya yo‘nalishi bo‘yicha harakatlanayotgan avtomashina ko‘zdan kechirish jarayonida avtotransport vositasining yuk bo‘limidagi muzlatgich ostiga beshta maxsus jihozlangan joyda 232 dona poliyetilen paketlarga qadoqlangan umumiy vazni 229 kg 719 gr geroin giyohvandlik vositasi aniqlanib, musodora qilingan.
- Mart oyida vaqtincha Surxondaryo viloyati Termiz shahrida yashovchi Afg‘oniston fuqarosi qo‘lga olingan. Uning vaqtinchalik yashash joyini ko‘zdan kechirish jarayonida 2 chemodanda 14 dona katta lagan qatlamiga yashirilgan 13 kg 990 gr geroin giyohvandlik vositasi aniqlanib, musodora qilingan.
- “Qora dori – 2022” tadbiri davomida jami 1 082 ta holatda 5797 kv/m maydonda tarkibida giyohvandlik vositalari bo‘lgan o‘simliklar ekib yetishtirilayotganligi aniqlangan. Shu bilan birga, 1496 kv/m maydondagi yovvoyi tarzda o‘sayotgan nasha o‘simliklari yo‘q qilingan.
Izoh (0)