Наманган ҳокими Тожикистонда Сўғд вилояти раиси билан музокаралар олиб борди

Наманган вилояти ҳокими Шавкат Абдураззоқов бошчилигидаги делегация Тожикистоннинг Сўғд вилоятига келди. Бу ҳақда “Дарё” мухбири Азизбек Абдувалиев хабар бермоқда.

Хўжандда Абдураззоқовнинг Суғд вилояти раиси Ражаббой Аҳмадзода билан музокаралари бўлиб ўтди. Мулоқот давомида икки қўшни вилоят ўртасида ижтимоий-иқтисодий, савдо-сотиқ, туризм ва маданият соҳаларида ҳамкорликни янада ривожлантириш бўйича бўйича “Йўл харитаси” имзоланди.

Наманган вилояти делегацияси Хўжанд давлат театрида ўтказилган “Савдо ва инвестиция имкониятлари — ҳамкорлик истиқболлари” мавзусидаги халқаро форумда иштирок этди. Ушбу форумда Шавкат Абдураззоқов ҳам сўзга чиқди.

Унинг қайд этишича, вилоятда Тожикистон билан ҳамкорликда 10 та қўшма корхона фаолият кўрсатмоқда. Ўзаро товар айирбошлаш ҳажми эса 7 миллион доллардан ортиқни ташкил этиб, 2016 йилга нисбатан 30 баробарга ошган.

Шавкат Абдураззақов тожикистонлик тадбиркорларни 1 200 гектар майдонда ташкил этилаётган Янги Наманган шаҳарчаси, вилоятдаги 2 та эркин иқтисодий ва 73 та кичик саноат зоналарида бизнес лойиҳаларини амалга оширишга чақирди.

Наманган вилояти делегацияси анъанавий “Суғд — 2023” халқаро савдо ярмаркасида ҳам бўлиб, бу ерда маҳаллий корхоналар, тадбиркорлар томонидан ишлаб чиқарилган маҳсулотлар ва миллий ҳунармандлик намуналари билан танишди. Ўзаро ҳамкорликни йўлга қўйиш бўйича юзма-юз учрашувлар ўтказилди.