Turkiya muxolifatidan 2023-yilgi prezidentlik saylovlarida ishtirok etgan Respublika xalq partiyasi yetakchisi Kamol Qilichdaro‘g‘li unga qarshi ochilgan 28 ta da’vo bo‘yicha tergov doirasida hibsga olinishi mumkin. Bu haqda Cumhuriyet telekanali xabar berdi.
Telekanalning tushuntirishicha, Qilichdaro‘g‘li prezidentlikka nomzodini qo‘ygani sababli o‘sha paytda bo‘lib o‘tayotgan parlament saylovlarida qatnasha olmagan, natijada deputatlik daxlsizligidan mahrum bo‘lgan.
Cumhuriyet ma’lumotlariga ko‘ra, Qilichdaro‘g‘li jami hisobda 110 yilgacha qamoq jazosiga hukm qilinishi mumkin. Muxolifat yetakchisiga qarshi da’volarning aksariyati amaldagi prezident Rajab Toyyib Erdo‘g‘onni haqorat qilish bilan bog‘liq.
Shu bilan birga, turkiyalik siyosatshunoslar muxolifat yetakchisining javobgarlikka tortilishi dargumon, degan fikrda, chunki bu mamlakatdagi siyosiy vaziyatning beqarorlashishiga olib kelishi mumkin.
- Turkiyada prezidentlik saylovlari 2023-yil may oyi o‘rtalarida bo‘lib o‘tdi. Birinchi turda Erdo‘g‘on 49,35 foiz, Qilichdaro‘g‘li esa 45 foiz ovoz oldi. G‘alaba qozonish uchun Erdo‘g‘onga 50 foizdan ko‘proq ovoz kerak edi, shu bois ikkinchi tur o‘tkazildi, uning natijalari 28-may kuni Turkiya Markaziy saylov komissiyasi tomonidan sarhisob qilindi. Erdo‘g‘on 52,14 foiz ovoz bilan g‘alaba qozongan bo‘lsa, Qilichdaro‘g‘li 47,86 foiz ovoz oldi.
Izoh (0)