Turkiyada 14-may kuni bo‘lib o‘tgan saylovda prezidentlikka nomzodlarning hech biri 50 foizdan ko‘p ovoz to‘play olmadi, shu munosabat bilan mamlakatda rasman ovoz berishning ikkinchi bosqichi o‘tkaziladi.
Turkiya Markaziy saylov komissiyasiga ko‘ra, ikkinchi bosqich 28-may kuni bo‘lib o‘tadi. Ikkala asosiy nomzod ham yakuniy g‘alabaga ishonch bildirgan.
Saylov qutilarining 100 foizi ochilishi natijalariga ko‘ra, amaldagi prezident Rajab Toyyib Erdo‘g‘on 49,51 foiz, muxolifat nomzodi Kamol Qilichdaro‘g‘li 44,88 foiz, “Otaturkchilar ittifoqi”dan Sinan Ogan 5,17 foiz ovoz olgan.
“Prezident saylovining ikkinchi bosqichi 28-may, yakshanba kuni bo‘lib o‘tadi”, — deydi MSK.
Avvalroq saylovning to‘rtinchi nomzodi bo‘lgan Vatan partiyasi yetakchisi Muharrem Inje saylovda qatnashmasligini bildirgandi. Inje mazkur xatti-harakatiga saylovoldi tashviqoti paytida unga zarba bergan kompromatlar to‘lqini sabab bo‘lganini aytgan.
Siyosatchi 45 kun davomida uning soxta, kompromat suratlari turk ommaviy axborot vositalarida tarqalib ketgani va huquq-tartibot idoralari bu faktlarni tekshirishdan chetlashganini ta’kidlagan.
Izoh (0)