Туркия мухолифатидан 2023 йилги президентлик сайловларида иштирок этган Республика халқ партияси етакчиси Камол Қиличдарўғли унга қарши очилган 28 та даъво бўйича тергов доирасида ҳибсга олиниши мумкин. Бу ҳақда Cumhuriyet телеканали хабар берди.
Телеканалнинг тушунтиришича, Қиличдарўғли президентликка номзодини қўйгани сабабли ўша пайтда бўлиб ўтаётган парламент сайловларида қатнаша олмаган, натижада депутатлик дахлсизлигидан маҳрум бўлган.
Cumhuriyet маълумотларига кўра, Қиличдарўғли жами ҳисобда 110 йилгача қамоқ жазосига ҳукм қилиниши мумкин. Мухолифат етакчисига қарши даъволарнинг аксарияти амалдаги президент Ражаб Тоййиб Эрдўғонни ҳақорат қилиш билан боғлиқ.
Шу билан бирга, туркиялик сиёсатшунослар мухолифат етакчисининг жавобгарликка тортилиши даргумон, деган фикрда, чунки бу мамлакатдаги сиёсий вазиятнинг беқарорлашишига олиб келиши мумкин.
- Туркияда президентлик сайловлари 2023 йил май ойи ўрталарида бўлиб ўтди. Биринчи турда Эрдўғон 49,35 фоиз, Қиличдарўғли эса 45 фоиз овоз олди. Ғалаба қозониш учун Эрдўғонга 50 фоиздан кўпроқ овоз керак эди, шу боис иккинчи тур ўтказилди, унинг натижалари 28 май куни Туркия Марказий сайлов комиссияси томонидан сарҳисоб қилинди. Эрдўғон 52,14 фоиз овоз билан ғалаба қозонган бўлса, Қиличдарўғли 47,86 фоиз овоз олди.
Изоҳ (0)