Xitoyda oziq-ovqat xavfsizligi bilan bog‘liq mojaro yuzaga keldi.
Gap shundaki, 1-iyun kuni Szyansi provinsiyasidagi Sanoat politexnika kolleji talabasi maktab oshxonasida o‘z idishida g‘alati narsani topgan.
Xitoy ijtimoiy tarmoqlariga joylangan videoda talaba tayoqchalari bilan qoramtir tukli buyumni ushlab, oshxona xodimlariga o‘z taomidan kalamushning kallasini topib olganini shikoyat qilayotgani aks etgan.
Ammo oshxona vakillari bu o‘rdak go‘shti ekanini ta’kidlashgan. Talabaning barcha da’volari rad etilgan.
Video internetga tarqalgach, Xitoyda katta shov-shuvga sabab bo‘ldi. Video ostidagi izohlarda ko‘pchilik talaba tomonida bo‘lib, ovqatdan chiqqan narsa kemiruvchining boshiga o‘xshashligini ta’kidlagan.
Jamoatchilik bosimi kuchaygach, kollej 3-iyun kuni bayonot berib, videoda ko‘rsatilgan narsa kalamushning boshi emas, Xitoyda mashhur delikates bo‘lgan o‘rdak bo‘yni bo‘lagi ekanligini da’vo qildi.
Ammo keyinchalik Xitoy hukumati tomonidan tayinlangan komissiya a’zolari video va fotosuratlarini o‘rganib chiqqach, bu kalamushning boshi ekanligini aniqlashdi.
Oshxona litsenziyasi bekor qilindi va uni boshqarayotgan kompaniya oziq-ovqat xavfsizligi to‘g‘risidagi qonunlarga ko‘ra maksimal jarimaga tortildi. Shuningdek, kollej va mahalliy bozor nazorati byurosi mutasaddilari ham jazolangan.
Izoh (0)