Хитойда талабанинг овқатидан каламуш боши топилгач, катта можаро юзага келди

Хитойда озиқ-овқат хавфсизлиги билан боғлиқ можаро юзага келди.

Гап шундаки, 1 июнь куни Цзянси провинциясидаги Саноат политехника коллежи талабаси мактаб ошхонасида ўз идишида ғалати нарсани топган.

Хитой ижтимоий тармоқларига жойланган видеода талаба таёқчалари билан қорамтир тукли буюмни ушлаб, ошхона ходимларига ўз таомидан каламушнинг калласини топиб олганини шикоят қилаётгани акс этган.

Аммо ошхона вакиллари бу ўрдак гўшти эканини таъкидлашган. Талабанинг барча даъволари рад этилган.

Видео интернетга тарқалгач, Хитойда катта шов-шувга сабаб бўлди. Видео остидаги изоҳларда кўпчилик талаба томонида бўлиб, овқатдан чиққан нарса кемирувчининг бошига ўхшашлигини таъкидлаган.

Жамоатчилик босими кучайгач, коллеж 3 июнь куни баёнот бериб, видеода кўрсатилган нарса каламушнинг боши эмас, Хитойда машҳур деликатес бўлган ўрдак бўйни бўлаги эканлигини даъво қилди.

Аммо кейинчалик Хитой ҳукумати томонидан тайинланган комиссия аъзолари видео ва фотосуратларини ўрганиб чиққач, бу каламушнинг боши эканлигини аниқлашди.

Ошхона лицензияси бекор қилинди ва уни бошқараётган компания озиқ-овқат хавфсизлиги тўғрисидаги қонунларга кўра максимал жаримага тортилди. Шунингдек, коллеж ва маҳаллий бозор назорати бюроси мутасаддилари ҳам жазоланган.