Sobiq Ittifoqning ilk ikki bosqichli termoyadro bombasi ixtirochilaridan biri Grigoriy Klinishov Moskvada o‘z joniga qasd qildi. U 92 yoshda edi, deb yozadi “Regnum” o‘z manbasiga tayanib.
Agentlik xabariga ko‘ra, muhandis-fizikning jasadini 17-iyun kuni Zamoskvoreche tumanidagi xonadonidan yaqinlari topgan. U o‘z joniga qasd qilishdan oldin xat qoldirgan. Lekin xatda nimalar yozilgani oshkor qilinmadi.
Grigoriy Yemelyanovich Klinishov 1930-yil 30-oktabrda tug‘ilgan. U fizika-matematika fanlari nomzodi, 1962-yilda Lenin mukofoti laureati bo‘lgan. Marhum olim Butunittifoq eksperimental fizika ilmiy-tadqiqot institutida termoyadro qurollarini yaratish bilan shug‘ullangan. Shuningdek, Klinishov birinchi sovet ikki bosqichli termoyadro bombasi RDS-37 ni yaratishda ishtirok etgan.
Ma’lumot uchun, mazkur bomba sinovlari 1955-yil 22-noyabrda Semipalatinsk poligonida bo‘lib o‘tgan. Shu kuni dunyoda birinchi marta quvvati 1 megatondan ortiq bo‘lgan vodorod bombasi sinovdan o‘tkazildi. Ushbu sinovlar 200 kilometrdan ortiq radiusda bir qator fojiali voqealarga olib keldi. 59 ta aholi punktida binolar vayron bo‘ldi, o‘nlab odamlar jarohatlandi. Portlash markazidan 240 kilometr uzoqlikdagi radiusda uylarning oynalari singani va radiatsiya darajasining oshishi qayd etildi.
Grigoriy Yemelyanovich keyingi avlod bombalari uchun bir necha turdagi termoyadro zaryadlarini ham ishlab chiqqan.
Izoh (0)