AQSHda laboratoriyada yetishtirilgan go‘shtni sotishga ruxsat berildi

AQSHda laboratoriya sharoitida ishlab chiqarilgan go‘shtni sotish mumkin bo‘ldi. AQSH Qishloq xo‘jaligi vazirligi Upside Foods va Good Meat kompaniyalariga madaniylashtirilgan go‘sht deb ataluvchi mahsulotni ishlab chiqarishga uzil kesil ruxsat berdi. Bu haqda kompaniyalarning bayonotiga tayanib, DW xabar berdi.

Shu tariqa AQSH Singapurdan keyin laboratoriya go‘shtini sotishga ruxsat bergan ikkinchi davlatga aylandi. Upside Foods buni “orzular ro‘yobga chiqishi” va “yangi davrning boshlanishi” deb atadi.

Ikkala Amerika kompaniyasi ham tovuq go‘shti yetishtirish bilan shug‘ullanadi. Laboratoriya mahsuloti po‘lat konteynerlarda semirtirilib, yetishtirilgan hayvon hujayralari namunasidan olinadi.

Upside Foods ham, Good Meat ham dastlab yuqori darajadagi restoranlarga laboratoriya go‘shtini yetkazib berishni rejalashtirmoqda. Ishlab chiqarish hajmi oshirilgandan so‘ng, bunday go‘sht oziq-ovqat do‘konlariga ham yetkazib beriladi.