Surxondaryo viloyati Sariosiyo tumanida elektr energiyasi yetib bormagan olis “Xushxabar” qishlog‘iga ilk bor suyultirilgan gaz ballonlar yetkazib berish boshlandi. Bu haqda “Hududgaz Surxondaryo” gaz ta‘minoti filiali matbuot xizmati rahbari Aziz Mashrabov “Daryo” muxbiriga bergan qisqacha intervyusida maʼlum qildi.
Aziz Mashrabovning aytishicha, “Xushxabar” qishlog‘ida avtomobil yo‘li bo‘lmagani bois suv ombori va tog‘ so‘qmoq yo‘llaridan gaz ballonlar yetkazish boshlangan.
“Qishloqqa borish uchun To‘palang suv omboridagi harbiylarning qayiqlari bilan bir soat yo‘l bosib o‘tish kerak. Yaʼni, suvda 15 kilometr yo‘l harbiy qayiqlar orqali yuriladi. Manzilga olib boruvchi boshqa yo‘l yo‘q. Qishloq ‘Hazrati Sulton’ cho‘qqisining eng yuqori nuqtalaridan birida — dengiz sathidan 2,5 ming metr balandlikda joylashgan. Suvdan chiqib qishloqqacha tog‘ so‘qmog‘i bo‘ylab 3 soat piyoda yuriladi. Gaz ballonlarni tog‘ yo‘lida tashish uchun eshaklardan foydalanildi”, — dedi Aziz Mashrabov.
Uning taʼkidlashicha, qishloqda aholi unchalik ko‘p emas, lekin ularga xizmat ko‘rsatish korxonaning asosiy vazifasiga kiradi.
“Qishloqda 7 ta xonadon bo‘lib, 65 nafar aholi yashaydi. Afsuski bu yerga elektr energiyasi va gaz quvurlari tortib kelinmagan. Sababi avtotransport yo‘li yo‘q. Qishloq aholisi so‘qmoq yo‘llardan qo‘shni shahar va qishloqlarga borib keladi. Quvonarlisi To‘palang suv omborining yuqori qismida tog‘dagi qishloqlarga olib boruvchi yo‘l qurilmoqda”, — dedi korxona masʼul xodimi.
Aziz Mashrabovning qo‘shimcha qilishicha, avvalroq xuddi shunday gaz ballonlarini Sariosiyo tumanining tog‘ yonbag‘irlarida joylashgan “Karsh” va “Vachaq” qishloqlariga ham yetkazib berish yo‘lga qo‘yilgan.
Maʼlumot uchun, Surxondaryo viloyatida 40 dan ortiq olis qishloqlarga gaz ballonlar yetkazib beriladi. Eng olis qishloq viloyat markazidan 320 km uzoqlikda joylashgan.
Izoh (0)