Сурхондарё вилояти Сариосиё туманида электр энергияси етиб бормаган олис “Хушхабар” қишлоғига илк бор суюлтирилган газ баллонлар етказиб бериш бошланди. Бу ҳақда “Ҳудудгаз Сурхондарё” газ таъминоти филиали матбуот хизмати раҳбари Азиз Машрабов “Дарё” мухбирига берган қисқача интервьюсида маълум қилди.
Азиз Машрабовнинг айтишича, “Хушхабар” қишлоғида автомобиль йўли бўлмагани боис сув омбори ва тоғ сўқмоқ йўлларидан газ баллонлар етказиш бошланган.
“Қишлоққа бориш учун Тўпаланг сув омборидаги ҳарбийларнинг қайиқлари билан бир соат йўл босиб ўтиш керак. Яъни, сувда 15 километр йўл ҳарбий қайиқлар орқали юрилади. Манзилга олиб борувчи бошқа йўл йўқ. Қишлоқ ‘Ҳазрати Султон’ чўққисининг энг юқори нуқталаридан бирида — денгиз сатҳидан 2,5 минг метр баландликда жойлашган. Сувдан чиқиб қишлоққача тоғ сўқмоғи бўйлаб 3 соат пиёда юрилади. Газ баллонларни тоғ йўлида ташиш учун эшаклардан фойдаланилди”, — деди Азиз Машрабов.
Унинг таъкидлашича, қишлоқда аҳоли унчалик кўп эмас, лекин уларга хизмат кўрсатиш корхонанинг асосий вазифасига киради.
“Қишлоқда 7 та хонадон бўлиб, 65 нафар аҳоли яшайди. Афсуски бу ерга электр энергияси ва газ қувурлари тортиб келинмаган. Сабаби автотранспорт йўли йўқ. Қишлоқ аҳолиси сўқмоқ йўллардан қўшни шаҳар ва қишлоқларга бориб келади. Қувонарлиси Тўпаланг сув омборининг юқори қисмида тоғдаги қишлоқларга олиб борувчи йўл қурилмоқда”, — деди корхона масъул ходими.
Азиз Машрабовнинг қўшимча қилишича, аввалроқ худди шундай газ баллонларини Сариосиё туманининг тоғ ёнбағирларида жойлашган “Карш” ва “Вачақ” қишлоқларига ҳам етказиб бериш йўлга қўйилган.
Маълумот учун, Сурхондарё вилоятида 40 дан ортиқ олис қишлоқларга газ баллонлар етказиб берилади. Энг олис қишлоқ вилоят марказидан 320 км узоқликда жойлашган.
Изоҳ (0)