Qashqadaryoda og‘zaki topshiriq bilan ishdan haydalgan mansabdor sud qarori bilan lavozimiga qaytdi

Maktabgacha va maktab taʼlimi vazirligining Qashqadaryo viloyati Chiroqchi tumani bo‘limining sobiq rahbari Farhod Jumanov og‘zaki topshiriq bilan lavozimidan olingani, uning ishdan olingani haqida hatto rasmiy buyruq ham yo‘qligi xabar berilgandi. Sud sobiq rahbarni lavozimiga tikladi. Bu haqda amaliyotchi yurist Saidali Muxtoraliyevning shaxsiy Telegram kanalida xabar berildi.

“Bugun fuqarolik ishlari bo‘yicha Shayxontohur tumanlararo sudida yana bir muhim ishimiz yakunlandi. Chiroqchi tumani xalq taʼlimi mudiri lavozimida ishlab kelgan fuqaro F.Jumanov vazirlik tomonidan yangi Mehnat kodeksining 161-moddasi ikkinchi qismi 2-bandi bilan, yaʼni go‘yoki qisqartirish vaji bilan ishdan bo‘shatilgan edi. Biz bu sudda himoyamizdagi F.Jumanovni qisqartirish vaji bilan ishdan bo‘shatishga hech qanday asos bo‘lmaganligini isbotlab berdik”, — deydi bu haqda jamoatchilikka xabar bergan yurist.

Saidali Muxtoraliyevning tushuntirish berishicha, Farhod Jumanov yangi Mehnat kodeksining 156-moddasi 1-qismi (eski Mehnat kodeksi 98-moddasi 1-qismi)ga asosan qayta tashkil etilgan tuman maktabgacha va maktab taʼlimi bo‘limi boshlig‘i lavozimida ishlashda davom etaverishi kerak bo‘lgan.

“Sudda Mehnat kodeksining 167-moddasi (eski kodeksda 103-modda)dagi eng nozik jihatlar, yaʼni xodimlarni malakasi va unumdorligiga ajratish tartibi buzilganligini, shunga o‘xshash 11 ta qonun buzilishi holati bo‘lganligini ko‘rsatib berdik. Yakunda sudya Lola Saidova juda adolatli qaror chiqardi va Farhod Jumanovni qayta tashkil etilgan tuman maktabgacha taʼlim va maktab taʼlimi boshlig‘i lavozimiga tiklanishi belgilandi”, — deydi u.

Eslatib o‘tamiz, Farhod Jumanovning ushbu muammosi “Daryo”da ham olib chiqilgan bo‘lib, unda sobiq rahbarning nohaq ishdan olingani maʼlum qilingandi. “Daryo” Qashqadaryoda yuzaga kelgan muammoli holat yuzasidan Maktabgacha va maktab taʼlimi vazirligi axborot xizmati bilan ham bog‘langandi. Vazir matbuot kotibi Dilfuza Sobirova tahririyat so‘roviga javoban “Hududlarda shu kabi masalalarni o‘rganish uchun ishchi guruh chiqadi. Ularga berib qo‘yaman”, — deyish bilan cheklangandi.