UzAuto Motors joriy yilning o‘tgan besh oyi davomida 120 mingtadan ortiq yengil avtomobillar ishlab chiqargan. Bu haqda Statistika agentligi xabar berdi.
Joriy yilning yanvar—may oylarida eng ko‘p ishlab chiqarilgan avtomobil Cobalt (39 ming 264 dona) bo‘ldi. Keyingi o‘rinlarda Lacetti (27 ming 961 dona), Damas (26 ming 815 dona), Tracker (8 ming 853 dona), Onix (6 ming 943 dona) ishlab chiqarilgan. Eng kam ishlab chiqarilgan avtomobil —Nexia T-250 (1 ming 992 dona) bo‘ldi. Shu bilan birga, 8 ming 612 dona maxsus yengil avtomobillar ishlab chiqarilgan.
UzAuto Motors 2022-yil 17-dekabrda Cobalt, Lacetti, Damas avtomobillari sotuvini to‘xtatgan. Kompaniya 2023-yildan Spark va Nexia o‘rniga Tracker va Onix ishlab chiqarishini maʼlum qilgan. Hozirda Tracker va Onix sotuvda mavjud. Ammo narxi 200 million so‘mdan yuqori bo‘lgan bu avtomobillar uchun navbat katta bo‘lib, to‘lov qilgan mijoz mashinasini olishni 1—1,5 yil kutishiga to‘g‘ri keladi.
Avvalroq UzAuto Motors vakili “Daryo” muxbiri bilan suhbatda ishlab chiqarilayotgan, ammo sotuvda mavjud bo‘lmagan mazkur avtomobillar qayerga “ketayotgani” to‘g‘risida maʼlumot bergandi.
“Ishlab chiqarilayotgan avtomobillar eski tuzilgan shartnomalar bo‘yicha yetkazib berilmoqda. Navbatlar kamaygach, sotuv shartnomalari qayta tiklanadi”, — deya maʼlum qilgan manba.
Izoh (0)