Мактабгача ва мактаб таълими вазирлигининг Қашқадарё вилояти Чироқчи тумани бўлимининг собиқ раҳбари Фарҳод Жуманов оғзаки топшириқ билан лавозимидан олингани, унинг ишдан олингани ҳақида ҳатто расмий буйруқ ҳам йўқлиги хабар берилганди. Суд собиқ раҳбарни лавозимига тиклади. Бу ҳақда амалиётчи юрист Саидали Мухторалиевнинг шахсий Telegram каналида хабар берилди.
“Бугун фуқаролик ишлари бўйича Шайхонтоҳур туманлараро судида яна бир муҳим ишимиз якунланди. Чироқчи тумани халқ таълими мудири лавозимида ишлаб келган фуқаро Ф.Жуманов вазирлик томонидан янги Меҳнат кодексининг 161-моддаси иккинчи қисми 2-банди билан, яъни гўёки қисқартириш важи билан ишдан бўшатилган эди. Биз бу судда ҳимоямиздаги Ф.Жумановни қисқартириш важи билан ишдан бўшатишга ҳеч қандай асос бўлмаганлигини исботлаб бердик”, — дейди бу ҳақда жамоатчиликка хабар берган юрист.
Саидали Мухторалиевнинг тушунтириш беришича, Фарҳод Жуманов янги Меҳнат кодексининг 156-моддаси 1-қисми (эски Меҳнат кодекси 98-моддаси 1-қисми)га асосан қайта ташкил этилган туман мактабгача ва мактаб таълими бўлими бошлиғи лавозимида ишлашда давом этавериши керак бўлган.
“Судда Меҳнат кодексининг 167-моддаси (эски кодексда 103-модда)даги энг нозик жиҳатлар, яъни ходимларни малакаси ва унумдорлигига ажратиш тартиби бузилганлигини, шунга ўхшаш 11 та қонун бузилиши ҳолати бўлганлигини кўрсатиб бердик. Якунда судья Лола Саидова жуда адолатли қарор чиқарди ва Фарҳод Жумановни қайта ташкил этилган туман мактабгача таълим ва мактаб таълими бошлиғи лавозимига тикланиши белгиланди”, — дейди у.
Эслатиб ўтамиз, Фарҳод Жумановнинг ушбу муаммоси “Дарё”да ҳам олиб чиқилган бўлиб, унда собиқ раҳбарнинг ноҳақ ишдан олингани маълум қилинганди. “Дарё” Қашқадарёда юзага келган муаммоли ҳолат юзасидан Мактабгача ва мактаб таълими вазирлиги ахборот хизмати билан ҳам боғланганди. Вазир матбуот котиби Дилфуза Собирова таҳририят сўровига жавобан “Ҳудудларда шу каби масалаларни ўрганиш учун ишчи гуруҳ чиқади. Уларга бериб қўяман”, — дейиш билан чекланганди.
Изоҳ (0)