AQSH prezidenti Jo Baydenning o‘g‘li Xanter Bayden AQSH prokuraturasi oldida aybini tan olishga rozi bo‘ldi va huquq-tartibot idoralari bilan kelishuvga erishdi, deb xabar bermoqda Daily Mail.
Sud bayonotida aytilishicha, 53 yoshli Xanter Bayden 2017 va 2018-yillarda 100 ming dollardan ortiq soliq to‘lashdan bo‘yin tovlaganini tan olgan, u ushbu davrda yiliga 1,5 million dollardan ko‘proq daromad orttirgan.
Shuningdek, sud hujjatida qayd etilishicha, Adliya vazirligi kichik Baydenga qarshi ayblovlar qo‘zg‘atadi, ammo uni 2018-yilda yengil o‘qotar qurol sotib olgani uchun jinoiy javobgarlikka tortmaslikka rozi bo‘ladi. O‘shanda Xanter Bayden giyohvand moddalar ham iste’mol qilgan. Sud bilan kelishuvga ko‘ra, Bayden ikki yil davomida giyohvand moddalardan yiroq bo‘lishi va boshqa hech qachon o‘qotar qurolga egalik qilmaslik shartlariga rozi bo‘lishi kerak.
Xanter Bayden va Delaver shtatidagi prokuratura o‘rtasidagi kelishuv federal sudya tomonidan tasdiqlanishi kerak.
Umuman olganda, prezidentning o‘g‘li AQSH Adliya vazirligi bilan soliq va o‘qotar qurollarga bog‘liq uchta ayblov bo‘yicha kelishuvga erishdi — uning doirasida Xanter qamoqqa tashlanmaydi va undagi ayblov olib tashlanadi. AQSHda tergovchilar bilan bunday bitim giyohvand moddalar iste’mol qilingan, ammo hech qanday zo‘ravonlik kuzatilmagan jinoyatlar uchun tuzilishi mumkin.
AQSH prezidenti Jo Bayden soliq qonunchiligini buzish bo‘yicha aybini tan olgan o‘g‘li Xanter bilan juda faxrlanishini aytdi.
Xanterning huquq-tartibot idoralari bilan kelishuvi haqida izoh so‘ragan jurnalistlarga Bayden: “Men o‘g‘lim bilan juda faxrlanaman”, deb javob berdi.
Eslatib o‘tamiz, AQSH sobiq prezidenti Donald Tramp va uning ittifoqchilari yillar davomida Xanter Baydenni Ukraina va Xitoydagi faoliyati bilan bog‘liq qonunbuzarliklarda ayblab keladi. Respublikachilar fikricha, AQSH prezidenti Jo Bayden bu harakatlardan xabardor bo‘lgan.
2020-yilda kichik Bayden federal prokurorlar uning soliq hisobotlarini ko‘rib chiqayotganini aytgandi. O‘shanda Jo Bayden Adliya vazirligi uning oila a’zolariga qarshi har qanday tergovni mustaqil olib borishiga ishontirgan.
Izoh (0)