Checheniston rahbari Ramzan Qodirovning 20 yoshli qizi Xutmat bobosi Axmat Qodirov sharafiga ta’sis etilgan respublikaning oliy mukofoti – Qodirov ordeni bilan taqdirlandi. Bu haqda Checheniston axborot va matbuot vaziri Axmed Dudayev o‘zining Telegram-kanalida ma’lum qildi.
Dudayevning so‘zlariga ko‘ra, Xutmat Qodirova “o‘ziga ishonib topshirilgan har qanday sohada ajoyib natija” ko‘rsatmoqda.
“Shu yoshida u respublika tibbiyoti rivojiga ulkan hissa qo‘shdi. Bularning barchasi uning o‘z xalqi va mamlakati oldidagi vatanparvarligini anglatadi!” — dedi vazir bayonotida.
Xutmat Qodirova 2023-yil martida Checheniston sog‘liqni saqlash kuratori etib tayinlangan edi. Shuningdek, u respublika rahbari kotibiyati boshlig‘ining o‘rinbosari lavozimida ham ishlaydi.
2021-yil oktabr oyida Qodirovning boshqa qizi Oishat Checheniston madaniyat vaziri bo‘lgandi. O‘sha paytda u 22 yoshda edi.
2023-yil aprelida Qodirovning jiyani 26 yoshli Hamzat Qodirov uning kuch bloki bo‘yicha maslahatchi yordamchisi bo‘ldi. Bundan biroz oldin u Mulk va yer munosabatlari vaziri, respublika bosh vaziri o‘rinbosari lavozimiga tayinlangan edi.
BBC rus xizmati 2018-yilda Chechenistondagi 158 nafar yuqori martabali amaldorning 30 foizi Ramzan Qodirovning qarindoshlari, 23 foizi qishloqdoshlari, yana 12 foizi do‘stlari va ularning qarindoshlari ekanini sanadi.
Izoh (0)