Xususiy maktablarga 1-sinfga borgan bolaning ota-onasiga maktab uchun oylik to‘lovining 450 ming so‘mi kompensatsiya qilib beriladi

Buxorolik saylovchilar bilan uchrashuvda prezidentlikka nomzod Shavkat Mirziyoyev ta’limni rivojlantirishga oid rejalar haqida ma’lumot berdi.

“2030 yilga qadar, yangi maktablar barpo etish va bor quvvatlarni oshirish hisobiga, qo‘shimcha 2,5 million o‘quvchi o‘rni yaratishni reja qilganmiz. Bunda, joriy yilda “Yiliga 500 ming o‘quvchi o‘rni” dasturini boshlaymiz”, – dedi nomzod.

Shavkat Mirziyoyev buning uchun Maktab infratuzilmasini rivojlantirish jamg‘armasi tashkil etilishi va unga har yili 1 milliard dollardan mablag‘ ajratilishini aytdi.

“Mazkur Jamg‘arma mablag‘lari hisobidan 170 ta yangi maktablar quriladi, 3 ming 210 tasi rekonstruksiya qilinadi. Natijada, qo‘shimcha 1 million 400 ming o‘quvchi o‘rni yaratiladi”, – dedi nomzod.

Shavkat Mirziyoyev xususiy maktablarga 1-sinfga borgan bolaning ota-onasiga bir yil davomida maktab uchun oylik to‘lovining 450 ming so‘mi kompensatsiya qilib berilishini aytdi.

Tadbirkorlarga xususiy maktab tashkil etish uchun olinadigan kreditning 14 foizdan ortgan qismi qoplab beriladi. Xususiy maktablarda muallimlar uchun talablar davlat maktablari bilan bir xil bo‘ladi. Shu orqali, maktablarda o‘quvchilar soni 35 nafardan ko‘p bo‘lgan birorta sinf qolmaydi.

“Umuman, hozirgi vaqtda xususiy maktablarda mavjud 85 ming o‘quvchi o‘rnini 2030 yilga qadar kamida 400 mingtaga yetkazish bo‘yicha barcha sharoitlarni yaratib beramiz”, – dedi nomzod.