Хусусий мактабларга 1-синфга борган боланинг ота-онасига мактаб учун ойлик тўловининг 450 минг сўми компенсация қилиб берилади

Бухоролик сайловчилар билан учрашувда президентликка номзод Шавкат Мирзиёев таълимни ривожлантиришга оид режалар ҳақида маълумот берди.

“2030 йилга қадар, янги мактаблар барпо этиш ва бор қувватларни ошириш ҳисобига, қўшимча 2,5 миллион ўқувчи ўрни яратишни режа қилганмиз. Бунда, жорий йилда “Йилига 500 минг ўқувчи ўрни” дастурини бошлаймиз”, – деди номзод.

Шавкат Мирзиёев бунинг учун Мактаб инфратузилмасини ривожлантириш жамғармаси ташкил этилиши ва унга ҳар йили 1 миллиард доллардан маблағ ажратилишини айтди.

“Мазкур Жамғарма маблағлари ҳисобидан 170 та янги мактаблар қурилади, 3 минг 210 таси реконструкция қилинади. Натижада, қўшимча 1 миллион 400 минг ўқувчи ўрни яратилади”, – деди номзод.

Шавкат Мирзиёев хусусий мактабларга 1-синфга борган боланинг ота-онасига бир йил давомида мактаб учун ойлик тўловининг 450 минг сўми компенсация қилиб берилишини айтди.

Тадбиркорларга хусусий мактаб ташкил этиш учун олинадиган кредитнинг 14 фоиздан ортган қисми қоплаб берилади. Хусусий мактабларда муаллимлар учун талаблар давлат мактаблари билан бир хил бўлади. Шу орқали, мактабларда ўқувчилар сони 35 нафардан кўп бўлган бирорта синф қолмайди.

“Умуман, ҳозирги вақтда хусусий мактабларда мавжуд 85 минг ўқувчи ўрнини 2030 йилга қадар камида 400 мингтага етказиш бўйича барча шароитларни яратиб берамиз”, – деди номзод.