O‘zbekiston bayrog‘idan foydalanish mumkin bo‘lgan holatlar kengaymoqda

“O‘zbekistonning Davlat bayrog‘i to‘g‘risida”gi qonunga o‘zgartirish va qo‘shimchalar kiritish haqidagi qonun loyihasi eʼlon qilindi. 

Qonun bilan davlat bayrog‘idan foydalanish mumkin bo‘lgan holatlar kengaymoqda. Shuningdek, loyihada bayroqqa nisbatan zarur hurmatni taʼminlash sharti bilan quyidagilar taklif etilmoqda:

• davlat bayrog‘idan sport musobaqalarida, ommaviy jismoniy tarbiya tadbirlarida, madaniy va o‘zga ommaviy tadbirlarda, oilaviy bayramlarda, xotiraviy sanalarni bayram qilishda hamda boshqa hollarda foydalanilishga ruxsat berish;
• bayroqdan va uning tasviri tushirilgan belgilardan jamoat joylari va binolarda, yashash yoki ish joylarida hamda ularga tutash bo‘lgan hududlarda, transport vositalarining salonida foydalanishga ruxsat berish;
• davlat organlarining ramzlarida (bayroq, geraldik belgi) va ularning rasmiy veb-saytlarida davlat bayrog‘ining tasviri tushirilgan belgilardan foydalanishga huquqiy asos o‘rnatish;
• davlat bayrog‘i tasviridan ustki kiyimga bezatish uchun foydalanishga ruxsat berish;
• davlat bayrog‘iga nisbatan hurmatsizlik bilan munosabatda bo‘linishiga yo‘l qo‘yilmaydigan hollar aniq belgilab berilmoqda.