Qashqadaryo viloyatining Qarshi tumanida yashovchi 36 yoshli erkak Bobur Sheraliyev yakshanba kuni ishga chaqirilib, uyiga o‘lik holda qaytdi. Bu haqda “Mening yurtim” telekanalining “Markaziy studiya” ko‘rsatuvida maʼlum qilindi.
“Egasi bo‘lganimizdan so‘ng uning biror joyi og‘riganda, mazasi qochganda borishimiz kerak edi-ku, bizni hech kim chaqirmadi-da”, — deydi marhumning yaqinlaridan biri.
Maʼlum qilinishicha, uch farzandning otasi 12 yildan beri Qarshi shahar Obodonlashtirish boshqarmasida ishlab kelgan 36 yoshli Bobur Sheraliyev 2023-yilning 18-iyun, yakshanba kuni ishga chaqirilgan.
“Shoira degan opa bor. U har kuni ertalab 05:30 larda telefon qilardi. O‘sha kuni ham telefon qilib, Bobur kel deb telefon qildi. Keyin chiqib ketdi. Aslida shanba, yakshanba dam kuni, ammo dam yo‘q edi”, — deydi marhumning xotini Zubayda Inoyatova.
Zubayda Inoyatova.
Marhumning o‘limi haqida uning akasiga o‘zini Qarshi shahar prokuraturasi tergovchisi deb tanishtirgan xodim o‘sha kuni soat 17:00 dan 18:00 gacha bo‘lgan vaqt oralig‘ida telefon orqali xabar bergan.
“Nima sababdan vafot etibdi desam, issiqda yuragi to‘xtab qolibdi, dedi. Pochcham telefon qilib, tok urib o‘libdi dedi. Shunda do‘xtirlarga tok uribdi-ku, desam do‘xtirlar bir-biriga qarab, bular bilib qolibdi-ku, deyishdi. Keyin xulosani boshqacha berishdi”, — deydi marhumning akasi Bekzod Sheraliyev.
Jurnalist G‘olib Amirov surishtiruvlari yakunida marhumning vafotiga favvoralarda texnik ishlarni olib borayotgan paytdagi tok urishi sabab bo‘lishi mumkinligini aytadi.
Qo‘shimcha qilinishicha, telekanal so‘roviga javoban viloyat prokuraturasi voqea yuzasidan Qarshi shahar prokuraturasi tomonidan tergovga qadar tekshiruv harakatlari olib borilayotganini bildirgan.
Izoh (0)