Бир ой давом этган байрам, 6 млн меҳмон ва соврин учун автомобиллар: Наманганда 62-халқаро гуллар фестивали якунланди (фото ва видео)

Наманганда 62-халқаро гуллар фестивали якунига етди. Бу ҳақда “Дарё” мухбири Азизбек Абдувалиев хабар бермоқда.

Тадбир ташкилотчиларининг билдиришича, бир ой давом этган фестиваль давомида 6 миллиондан ортиқ меҳмон қарши олинган. Улардан 100 мингга  яқинини АҚШ, Буюк Британия, Германия, Япония, Жанубий Корея, Саудия Арабистони, Хитой, Покистон, Эрон, Ҳиндистон, Қозоғистон, Қирғизистон, Тожикистон ва Россия каби 30 дан зиёд мамлакатдан келган хорижий сайёҳлар ташкил этган.

Халқаро гуллар фестивали доирасида халқаро IT-форум, туризм бўйича  илмий-амалий конференция, ҳунармандлар кўргазмаси, ўзбек палови чемпионати, қўл жанги бўйича турнир, Фарғона водийси модалар ҳафталиги, Ўзбекистон миллий симфоник оркестри концерти, Ўзбек миллий академик драма театри спектакллари, аския ва кулги кечалари, жаҳон эстрадаси юлдузлари — туркиялик Рафет Эл Роман, озарбайжонлик Толиб Тале ва Зайнаб Ҳасанийнинг шоу-дастурлари бўлиб ўтди.

Давлатобод туманидаги “Афсоналар водийси” боғи 62-халқаро гуллар фестивалининг тақдирлаш маросими ва гала-концертга мезбонлик қилди. Фестиваль якунларига кўра профессионал гулчи Ойбек Нуриддинов, Норин тумани ҳокимлиги, “Ҳудудий электр тармоқлари” акциядорлик жамияти Наманган филиали ва “Chortoq mineral water” қўшма корхонаси ғолибликни қўлга киритди ҳамда бош соврин—автомобилларни қўлга киритди.

Шунингдек, “Энг яхши гул композицияси”, “Энг яхши гулчилик мактаби”, “Энг кўп гул етиштирган гулчи” каби номинациялар бўйича ғолиблар ҳам тақдирланиб, уларга пул мукофотлари берилди. Фестивалда фаол иштирок этганлар эса ташаккурнома ва эсдалик совғалари билан тақдирланди.

Тантанали маросим Ўзбекистонда хизмат кўрсатган артистлар Озода Нурсаидова ва Улуғбек Раҳматуллаев ҳамда вилоят санъат усталари ижросидаги гала-концертга уланиб кетди. Икки соат давом этган тадбир байрамона мушакбозлик билан якунланди.