Indoneziyaning birinchi prezidenti sharafiga O‘zbekistonda kutubxona qurish taklif qilindi

Indoneziya vitse-prezidenti Maʼruf Amin O‘zbekistonga tashrifi chog‘ida Indoneziyaning birinchi prezidenti Sukarno xotirasiga kutubxona qurishni taklif qildi. Bu Indoneziya va O‘zbekiston o‘rtasidagi tarixiy yaqinlik bilan bog‘liq, deb yozadi Indoneziyaning Disway nashri.

Maʼruf Amin ta’kidlashicha, Sukarno Samarqanddagi Imom Buxoriy maqbarasining qurilishiga turtki bo‘lgan shaxslardan edi, hozirgi kunda maqbara mashhur ziyoratgoh sifatida minglab sayyohlarni jalb qiladi.

“Men Sukarnoning konstruksiya qurilishidagi xizmatlarini eslatib turish uchun qabr atrofida uning memorial kutubxonasini qurishni taklif qildi. Umid qilamanki, buni amalga oshirsa bo‘ladi”, — dedi vitse-prezident 14-iyun kuni.

Ma’ruf Amin, shuningdek, Indoneziya va O‘zbekiston o‘rtasidagi yaqin munosabatlar birinchi prezident Sukarno tashabbusi bilan boshlanganini ta’kidladi.

“Bosh vazir Indoneziya bilan munosabatlarini juda yaqin deb hisoblaydi, chunki bu munosabatlar birinchi prezident tomonidan boshlangan. Sukarno O‘zbekistonda bo‘lgan va aynan u Imom Buxoriy qabrini ziyoratgohga aylantirishga undagan. Bu Sukarnoning xizmati”, — deb tushuntirdi vitse-prezident.

Ta’kidlanishicha, memorial kutubxona qurish g‘oyasi Indoneziya va O‘zbekiston hukumatlari o‘rtasida muhokama qilingan.

 “Yangi g‘oyalar Turizm vazirlari o‘rtasida muhokama qilindi”, — deya qo‘shimcha qildi u.

Shuningdek, vitse-prezident O‘zbekiston bosh vaziri Abdulla Aripov bilan savdo, transport, turizm sohalarida chuqur hamkorlikni yo‘lga qo‘yish masalalarini gaplashgan.

Eslatib o‘tamiz, Indoneziya vitse-prezidenti Maʼruf Amin 12-iyun kuni besh kunlik tashrif bilan O‘zbekistonga keldi.