Xorazmda DXX va IIB hamkorligida o‘tkazilgan tezkor tadbirda 1,3 milliard so‘m pora talab qilgan yo‘l qurilish tashkiloti bo‘lim boshlig‘i qo‘lga olindi. Bu haqda O‘zA xabar berdi.
Ma’lum qilinishicha, “Xorazm yo‘l qurilish” MCHJda bo‘lim boshlig‘i lavozimida ishlovchi shaxs Xiva tumanidagi oilaviy korxonaga tegishli 8500 kvadrat metr yer maydoniga hech qanday hujjat rasmiylashtirmasdan, asfalt yotqizib berish evaziga korxona rahbaridan 1 milliard 306 million so‘m talab qilgan. Shundan 48 ming AQSH dollarini olayotganida qo‘lga tushgan.
Boshqa holatda esa Davlat kadastrlari palatasining Xiva tuman filiali xodimi o‘zining qaynotasi nomida bo‘lgan 4000 kvadrat metr yer maydoni 2021-yilda xaridorga notarial tartibda sotilganini bila turib, go‘yoki ushbu yer maydonida uning ham ulushi bo‘lganini ro‘kach qilish orqali, yerni sotib olgan fuqarodan o‘z ulushi sifatida 60 ming dollar berishi kerakligini talab qilgan.
O‘tkazilgan tezkor tadbirda u so‘ralgan pulni tanishi orqali olgan vaqtida ushlangan.
Izoh (0)