Хоразмда ДХХ ва ИИБ ҳамкорлигида ўтказилган тезкор тадбирда 1,3 миллиард сўм пора талаб қилган йўл қурилиш ташкилоти бўлим бошлиғи қўлга олинди. Бу ҳақда ЎзА хабар берди.
Маълум қилинишича, “Хоразм йўл қурилиш” МЧЖда бўлим бошлиғи лавозимида ишловчи шахс Хива туманидаги оилавий корхонага тегишли 8500 квадрат метр ер майдонига ҳеч қандай ҳужжат расмийлаштирмасдан, асфалт ётқизиб бериш эвазига корхона раҳбаридан 1 миллиард 306 миллион сўм талаб қилган. Шундан 48 минг АҚШ долларини олаётганида қўлга тушган.
Бошқа ҳолатда эса Давлат кадастрлари палатасининг Хива туман филиали ходими ўзининг қайнотаси номида бўлган 4000 квадрат метр ер майдони 2021 йилда харидорга нотариал тартибда сотилганини била туриб, гўёки ушбу ер майдонида унинг ҳам улуши бўлганини рўкач қилиш орқали, ерни сотиб олган фуқародан ўз улуши сифатида 60 минг доллар бериши кераклигини талаб қилган.
Ўтказилган тезкор тадбирда у сўралган пулни таниши орқали олган вақтида ушланган.
Изоҳ (0)