Ekvadorda shifokorlar o‘ldiga chiqargan keksa ayol tobutda nafas olishni boshladi (video)

Ekvador hukumati Babaoyo shahridagi Martin Ikas kasalxonasida shifokorlar tomonidan o‘lgan, deb aytilgan keksa ayol dafn marosimiga tayyorgarlik vaqtida nafas olishni boshlagani voqeasini tergov qilmoqda.

The Guardian nashrining Ekvador Sog‘liqni saqlash vazirligiga tayanib yozishicha, 76 yoshli Bella Montoya 9-iyun kuni insult va yurak to‘xtab qolishi gumoni bilan kasalxonaga yotqizilgan. Shifokorlar ayolga yordam berishga uringan, biroq u jonlantirish choralariga reaksiya bildirmagan. Natijada navbatchi shifokor uning o‘lganini ma’lum qilgan.

Shu kuni ayolning oilasi uning jasadini dafn marosimiga olib ketgan.

“U yerda 20 kishi edik. Taxminan besh soatdan keyin tobutdan tovush eshitildi. Biz yaqin borib, uning zo‘rg‘a nafas olayotganini ko‘rdik”, — dedi ayolning o‘g‘li Jilberto Barbera Associated Press’ga.

Shundan so‘ng Bella Montoya avval uni o‘ldiga chiqarishgan kasalxonaga olib ketilgan. U reanimatsiya bo‘limiga yotqizilgan, hozirda shifokorlar nazoratida.

“Onam sun’iy nafas olish apparatiga ulangan, yurak urishi barqaror. Doktor uning qo‘lini chimchiganda, u javob berdi. Aytishlaricha, bu yaxshi alomat”, — dedi Barbera.

Ekvador Sog‘liqni saqlash vazirligi hodisani tekshirish uchun maxsus qo‘mita tuzdi. Bella Montoyaning qarindoshlari tibbiy xatolik yuzasidan prokuraturaga ariza yozmoqchi.