Швейцариянинг UBS банки ўзи эгалик қилувчи Credit Suisse банки ходимларига пул ювиш, порахўрлик ва коррупция хавфини чеклаш учун хавф даражаси юқори мамлакатлардан, шу жумладан, Ўзбекистондан янги мижозларни жалб қилишни тақиқлади, деб ёзмоқда Financial Times.
Нашр маълумотларига кўра, UBS жиддий муаммоларга учраган рақибига эгалик қилишни бошлаганидан кейин Credit Suisse банкирларига қаттиқ чекловлар қўйган, хусусан, юқори хавф тоифасига кирувчи мамлакатлардан янги мижозлар жалб қилиш тақиқланган.
Пул ювиш, порахўрлик ва коррупция хавфини чеклаш учун янги мижозларни жалб қилиш тақиқланган мамлакатлар рўйхатида Афғонистон, Альбания, Беларусь, Буркина-Фасо, Конго, Салвадор, Эритрея, Эфиопия, Гвинея, Гаити, Ироқ, Косово, Қирғизистон, Ливия, Молдова, Мянма, Никарагуа, Фаластин, Россия, Шри-Ланка, Судан, Тожикистон, Туркманистон, Венесуэла, Яман, Зимбабве ва Ўзбекистон борлиги айтилган.
UBS ва Credit Suisse банкларининг ўзи бу қоидалар юзасидан изоҳ беришни истамади.
Қайд этилишича, икки банк бирлаштирилган кундан бошлаб Credit Suisse ходимларига бир қатор фаолиятни тақиқловчи йигирмага яқин “қизил чизиқлар” рўйхати тузилган. Потенсиал пул ювишнинг олдини олиш учун украиналик сиёсатчилар ва давлат корхоналари ҳам блокланиши айтилган.
Credit Suisse ходимлари, шунингдек, UBS раҳбарларидан яхталар, кемалар ва 60 миллион доллардан ортиқ кўчмас мулк каби активлар билан таъминланган кредитлар муддатларини узайтириш учун рухсат сўраши керак бўлади.
Эслатиб ўтамиз, Мустақил медиа марказлар ва журналистлар халқаро тармоғи платформаси OCCRP Швейцариянинг Credit Suisse банкидан сиздирилган 18 мингдан ортиқ ҳисоб рақамларини ўрганиб, банк хизмат кўрсатган муаммоли мижозларни аниқлаган эди. Банк томонидан хизмат кўрсатилган бундай мижозлар орасида юқори лавозимли сиёсатчилар ва уларнинг яқинлари бор. Улар орасида 4 нафар ўзбекистонлик ҳам мавжудлиги хабар қилинган.
Изоҳ (0)