Saudiya Arabistoni Milliy banki rahbari Credit Suisse’ga yangi sarmoya kiritishdan bosh tortgani uchun iste’foga chiqdi

Saudiya Arabistonining eng yirik banki Saudiya Milliy banki raisi Ammar al-Xudayriy o‘z so‘zlari Shveysariyaning Credit Suisse banki aksiyalari narxining keskin tushib ketishiga sabab bo‘lganidan so‘ng iste’foga chiqmoqda. Bu haqda bank bayonotiga tayanib Bloomberg xabar bermoqda. 

Saudiya Milliy banki Credit Suisse’ning eng yirik aksiyadorlaridan biri hisoblanadi.

Bloomberg agentligiga ko‘ra, Saudiya Milliy banki rahbari lavozimini bank bosh ijrochi direktori Said Muhammad al-G‘amdi egallaydi.

13-mart kuni Credit Suisse moliyaviy hisobotlarida “moddiy kamchiliklar” aniqlanganini aytdi. 

Ammar al-Xudayriy Saudiya Milliy banki tartibga soluvchi talablar tufayli bankka yangi sarmoya kiritishdan bosh tortgan edi. Natijada 15-mart kuni bank aksiyalari 30 foizga arzonlashdi.

19-mart kuni Shveysariya Milliy banki mamlakatdagi ikki yirik bank — UBS va Credit Suisse birlashishi haqida e’lon qildi. 

UBS Credit Suisse aksiyalarini har biri 0,5 frankka sotib oladi. Bitimning umumiy qiymati 2 mlrd dollardan oshadi.