Rossiya Favqulodda vaziyatlar vazirligining Krasnodar o‘lkasi bo‘yicha bosh boshqarmasi maʼlumotlariga ko‘ra, kuchli yomg‘ir tufayli Sochi shahrining Xostinskiy tumanida Matsesta daryosi o‘zanidan toshib ketdi. Unga tutash to‘rtta hudud, maʼmuriy bino va nasos stansiyasini suv bosgan.
Sochi meri Aleksey Kopaygorodskiy oltita ko‘chadagi uylarni suv bosganini aytdi. Gaz quvuri va elektr tarmoqlari ham shikastlangan, dedi Sochi rahbari o‘rinbosari Vadim Snegirev.
Sochi maʼmuriyatining maʼlum qilishicha, bir soat ichida kamida 15 millimetr yomg‘ir yog‘gan va daryodagi suv sathini ko‘rsatuvchi datchik “xavfli hodisa” chizig‘iga chiqqan. Matsesta hududida tirbandlik tufayli jamoat transporti harakati to‘xtab qoldi. Shahar meri toshqin oqibatlarini bartaraf etish bo‘yicha ko‘rsatma berdi.
Shaharda “ob-havo to‘liq yaxshilanmaguncha” plyajlarni vaqtincha yopishga qaror qilindi, dedi Aleksey Kopaygorodskiy. “Dam oluvchilar xavfsizligini ta’minlash maqsadida hozir suzish taqiqlangan”, — dedi u.
Meriyaning qayd etishicha, 14-iyun kuni kun oxirigacha Sochida kuchli yomg‘ir, momaqaldiroq va do‘l yog‘ishi kutilmoqda. Daryolarda suv sathi salbiy darajaga yetishi mumkin, shuningdek, sel xavfi bor. Shaharda bo‘ron haqida muntazam ogohlantirish berilmoqda.
Izoh (0)