AQSH Davlat departamenti Eron Rossiya va Tojikistonga ularning hududida uchuvchisiz uchar apparatlar ishlab chiqarishni yo‘lga qo‘yishda yordam taklif qilganini ma’lum qildi. Bu haqda AQSH Moliya vazirligining Xorijiy aktivlarni nazorat qilish boshqarmasi veb-saytida chop etilgan biznes tavsiyalarda aytiladi.
Davlat departamenti, Moliya vazirligi, Savdo vazirligi va Adliya vazirligi tomonidan tayyorlangan hujjatda shunday deyiladi:
“Bizdagi maʼlumotlarga ko‘ra, Eron Tojikiston va Rossiyaga dron texnologiyasi va jihozlarini taqdim etishni taklif qilgan. Bunday sa’y-harakatlar bilan Tehron ikki tomonlama munosabatlarni mustahkamlashga, eksport daromadlarini oshirishga, shuningdek, dronlardan foydalanishga cheklov qo‘yishni qiyinlashtirishga urinayotgan bo‘lishi mumkin”.
Hisobotda aytilishicha, kamida 2022-yilning avgustidan beri Eron Rossiyaga Shahed va Mohajer seriyali yuzlab dronlarni topshirgan.
“Moskva bu dronlardan Ukrainaga qarshi shafqatsiz bosqinchilik urushi paytida muhim infratuzilmaga zarba berish uchun keng foydalangan”, — deyiladi hujjatda.
Tavsiyalarda Eron dronlar ishlab chiqarishda foydalanadigan ba’zi komponentlar haqida umumiy ma’lumot berilgan. AQSH rasmiylari kompaniyalardan ushbu komponentlarning Eronga kirishiga yo‘l qo‘ymaslikni so‘ragan.
Izoh (0)