АҚШ Давлат департаменти Эрон Россия ва Тожикистонга уларнинг ҳудудида учувчисиз учар аппаратлар ишлаб чиқаришни йўлга қўйишда ёрдам таклиф қилганини маълум қилди. Бу ҳақда АҚШ Молия вазирлигининг Хорижий активларни назорат қилиш бошқармаси веб-сайтида чоп этилган бизнес тавсияларда айтилади.
Давлат департаменти, Молия вазирлиги, Савдо вазирлиги ва Адлия вазирлиги томонидан тайёрланган ҳужжатда шундай дейилади:
“Биздаги маълумотларга кўра, Эрон Тожикистон ва Россияга дрон технологияси ва жиҳозларини тақдим этишни таклиф қилган. Бундай саъй-ҳаракатлар билан Теҳрон икки томонлама муносабатларни мустаҳкамлашга, экспорт даромадларини оширишга, шунингдек, дронлардан фойдаланишга чеклов қўйишни қийинлаштиришга уринаётган бўлиши мумкин”.
Ҳисоботда айтилишича, камида 2022 йилнинг августидан бери Эрон Россияга Shahed ва Mohajer серияли юзлаб дронларни топширган.
“Москва бу дронлардан Украинага қарши шафқатсиз босқинчилик уруши пайтида муҳим инфратузилмага зарба бериш учун кенг фойдаланган”, — дейилади ҳужжатда.
Тавсияларда Эрон дронлар ишлаб чиқаришда фойдаланадиган баъзи компонентлар ҳақида умумий маълумот берилган. АҚШ расмийлари компаниялардан ушбу компонентларнинг Эронга киришига йўл қўймасликни сўраган.
Изоҳ (0)