Qoraqalpog‘istonda Lacetti va Labo to‘qnashishi oqibatida ikki kishi halok bo‘ldi, yana ikki nafari tan jarohatlari oldi. Bu haqda Qoraqalpog‘iston IIV matbuot xizmati xabar berdi.
Voqea 12-iyun kuni soat 14:30 da 4R-176-sonli Nukus—Chimboy—Taxtako‘pir avtomobil yo‘lining 43-44 kilometri oralig‘ida yuz bergan.
Nukus shahridan Chimboy tumani yo‘nalishi bo‘yicha harakatlanib borayotgan Labo va ushbu yo‘l orqali Qorauzyak tumanidan Nukus shahriga qarab harakatlanib kelayotgan Lacetti yo‘lning qarama-qarshi yo‘nalishiga chiqib ketishi oqibatida to‘qnashgan.
Oqibatda Labo haydovchisi R.T. hamda Lacetti yo‘lovchisi Sh.S. voqea joyida vafot etgan. Lacetti haydovchisi B.M. va ushbu avtomashinaning yana bir yo‘lovchisi — voyaga yetmagan A.B. tan jarohatlari bilan Kegayli tuman tibbiyot birlashmasiga yotqizilgan.
Mazkur holat yuzasidan Qoraqalpog‘iston IIV huzuridagi Tergov boshqarmasi tomonidan Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan jinoyat ishi qo‘zg‘atilib, dastlabki tergov harakatlariga kirishilgan.
Izoh (0)