Қорақалпоғистонда Lacetti ва Labo тўқнашиши оқибатида икки киши ҳалок бўлди, яна икки нафари тан жароҳатлари олди. Бу ҳақда Қорақалпоғистон ИИВ матбуот хизмати хабар берди.
Воқеа 12 июнь куни соат 14:30 да 4R-176-сонли Нукус—Чимбой—Тахтакўпир автомобиль йўлининг 43-44 километри оралиғида юз берган.
Нукус шаҳридан Чимбой тумани йўналиши бўйича ҳаракатланиб бораётган Labo ва ушбу йўл орқали Қораузяк туманидан Нукус шаҳрига қараб ҳаракатланиб келаётган Lacetti йўлнинг қарама-қарши йўналишига чиқиб кетиши оқибатида тўқнашган.
Оқибатда Labo ҳайдовчиси Р.Т. ҳамда Lacetti йўловчиси Ш.С. воқеа жойида вафот этган. Lacetti ҳайдовчиси Б.М. ва ушбу автомашинанинг яна бир йўловчиси — вояга етмаган А.Б. тан жароҳатлари билан Кегайли туман тиббиёт бирлашмасига ётқизилган.
Мазкур ҳолат юзасидан Қорақалпоғистон ИИВ ҳузуридаги Тергов бошқармаси томонидан Жиноят кодексининг 266-моддаси 3-қисми “а” банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилиб, дастлабки тергов ҳаракатларига киришилган.
Изоҳ (0)