Украинанинг НАТОга кириши йўлидаги асосий тўсиқ Венгрия ёки Россиянинг позицияси эмас, балки альянс аъзоларининг қуролли тўқнашув ҳолатида бўлган давлатни қабул қилиш бўйича ички муҳокамаси ҳисобланади. Бу ҳақда Латвия президенти Эдгар Ринкевич “Украинская правда” газетасига берган интервьюсида айтиб ўтди.
Сиёсатчининг тушунтиришича, НАТО низомининг жамоавий мудофааси белгилаб қўйилган бешинчи модда сабаб альянснинг аксарият давлатлари ҳукуматлари бу ҳолатда нима қилиш кераклигини билмаяпти.
“Очиғини айтганда, асосий савол шу. Ва бу саволга альянсга аъзо давлатларнинг кўпчилиги жавоб бера олмайди. Улар ўзлари учун жавоб топмагунча, НАТОнинг бошқа аъзолари билан бир столда жавоб бера олмайди”, — дея қўшимча қилди Ринкевич.
Латвия президенти Рига Украинанинг НАТОга қўшилишини қўллаб-қувватлаши ва бунга кўмаклашиш ниятида эканини таъкидлади. Унинг фикрича, “якуний қарор қабул қилиш” вақти келганида, қолган давлатлар ҳам буни маъқуллайди.
Маълумот учун НАТО низомининг бешинчи моддаси НАТОнинг жамоавий мудофаа тамойилига бағишланган. Унга кўра, альянс аъзоларидан бирига қилинган ҳужум НАТОнинг барча аъзоларига қилинган ҳужум сифатида баҳоланади.
Киев Россия босқини бошланганидан сўнг НАТОга қўшилиш саъй-ҳаракатларини кучайтирди, аммо альянсга қўшилиш Москва билан можаро тугамагунча амалга ошмаслигини тан олди. Унга қадар Ғарб давлатлари Украинага хавфсизлик кафолатларини бериши керак, деди Владимир Зеленский. Киевнинг қайд этишича, Украинанинг аризасини 20 та давлат (альянсда 31 та давлат бор) маъқуллаган.
Изоҳ (0)