Toshkent shahridagi dorixonalarda O‘zbeksitonga noqonuniy olib kirilgan, ro‘yxatdan o‘tmagan dori vositasi sotuvga chiqarilgani aniqlandi. Bu haqda “Daryo”ga Farmatsevtika tarmog‘ini rivojlantirish agentligi axborot xizmati rahbari Sevara Tulyaganova xabar berdi.
Maʼlum bo‘lishicha, Farmatsevtika tarmog‘ini rivojlantirish agentligiga “Dori vositalari, tibbiy buyumlar va tibbiy texnika ekspertizasi va standartlashtirish davlat markazi” DUKning xati orqali Toshkent shahridagi dorixonalarda ishlab chiqaruvchisi go‘yoki Rhydburg Pharmaceuticals Ltd India bo‘lgan “Operazon-N” dori vositasi sotilayotgani bildirilgan. Davlat markazi tomonidan o‘tkazilgan ekspertiza natijalariga ko‘ra, sotuvdagi dori vositasi “muvofiqlik sertifikati”ga ega bo‘lmagani, davlat ro‘yxatidan o‘tkazilmagan va qalbakilashtirilgani haqidagi rasmiy xabar kelib tushgan.
“Ushbu dori vositasi muomalasiga chek qo‘yish maqsadida, muvofiqlik sertifikatiga ega bo‘lmagan, davlat ro‘yxatidan o‘tmagan, qalbakilashtirilgan dori vositasi zudlik bilan muomaladan chiqarildi. Qo‘shimcha tarzda tadbirkorlar Vazirlar Mahkamasi qarori bilan tasdiqlangan sifatsiz, qalbakilashtirilgan, O‘zbekiston Respublikasida ro‘yxatdan o‘tkazilmagan dori vositalari va tibbiy buyumlar olib kelsa, ro‘yxatdan o‘tkazilgan dori vositalarining g‘ayriqonuniy nusxalarini, shuningdek, muomaladagi dori vositalari va tibbiy buyumlar nizomda belgilangan tartibda yo‘q qilinishi haqida ogohlantirdik”, — deydi Sevara Tulyaganova.
“Dori vositalari va farmatsevtika faoliyati to‘g‘isida”gi qonunning 18-,19- va 20-moddalarida qalbakilashtirilgan, O‘zbekiston Respublikasida ro‘yxatdan o‘tkazilmagan dori vositalari va tibbiy buyumlar, shuningdek, O‘zbekiston Respublikasida ro‘yxatdan o‘tkazilgan dori vositalarining g‘ayriqonuniy nusxalarini ishlab chiqarish, sifatsiz, qalbakilashtirilgan, O‘zbekiston Respublikasida ro‘yxatdan o‘tkazilmagan dori vositalarini va tibbiy buyumlarni, shuningdek, O‘zbekiston Respublikasida ro‘yxatdan o‘tkazilgan dori vositalarining g‘ayriqonuniy nusxalarini xarid qilish hamda ulgurji va chakana realizatsiya qilish va ulardan foydalanish taqiqlab qo‘yilgan.
Agentlik shuningdek, tadbirkorlarga murojaat qilib, amaldagi qonunchilikka ko‘ra ushbu huquqbuzarliklar maʼmuriy va jinoiy javobgarliklar bilan bir qatorda litsenziya talab-shartlarining qo‘pol buzilish holati deb baholanib, litsenziyani bekor qilishgacha olib borishini eslatmoqda.
Izoh (0)