Тошкент шаҳридаги дорихоналарда Ўзбекситонга ноқонуний олиб кирилган, рўйхатдан ўтмаган дори воситаси сотувга чиқарилгани аниқланди. Бу ҳақда “Дарё”га Фармацевтика тармоғини ривожлантириш агентлиги ахборот хизмати раҳбари Севара Туляганова хабар берди.
Маълум бўлишича, Фармацевтика тармоғини ривожлантириш агентлигига “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУКнинг хати орқали Тошкент шаҳридаги дорихоналарда ишлаб чиқарувчиси гўёки Rhydburg Pharmaceuticals Ltd India bo‘lgan “Operazon-N” дори воситаси сотилаётгани билдирилган. Давлат маркази томонидан ўтказилган экспертиза натижаларига кўра, сотувдаги дори воситаси “мувофиқлик сертификати”га эга бўлмагани, давлат рўйхатидан ўтказилмаган ва қалбакилаштирилгани ҳақидаги расмий хабар келиб тушган.
“Ушбу дори воситаси муомаласига чек қўйиш мақсадида, мувофиқлик сертификатига эга бўлмаган, давлат рўйхатидан ўтмаган, қалбакилаштирилган дори воситаси зудлик билан муомаладан чиқарилди. Қўшимча тарзда тадбиркорлар Вазирлар Маҳкамаси қарори билан тасдиқланган сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситалари ва тиббий буюмлар олиб келса, рўйхатдан ўтказилган дори воситаларининг ғайриқонуний нусхаларини, шунингдек, муомаладаги дори воситалари ва тиббий буюмлар низомда белгиланган тартибда йўқ қилиниши ҳақида огоҳлантирдик”, — дейди Севара Туляганова.
“Дори воситалари ва фармацевтика фаолияти тўғисида”ги қонуннинг 18-,19- ва 20-моддаларида қалбакилаштирилган, Ўзбекистон Республикасида рўйхатдан ўтказилмаган дори воситалари ва тиббий буюмлар, шунингдек, Ўзбекистон Республикасида рўйхатдан ўтказилган дори воситаларининг ғайриқонуний нусхаларини ишлаб чиқариш, сифатсиз, қалбакилаштирилган, Ўзбекистон Республикасида рўйхатдан ўтказилмаган дори воситаларини ва тиббий буюмларни, шунингдек, Ўзбекистон Республикасида рўйхатдан ўтказилган дори воситаларининг ғайриқонуний нусхаларини харид қилиш ҳамда улгуржи ва чакана реализация қилиш ва улардан фойдаланиш тақиқлаб қўйилган.
Агентлик шунингдек, тадбиркорларга мурожаат қилиб, амалдаги қонунчиликка кўра ушбу ҳуқуқбузарликлар маъмурий ва жиноий жавобгарликлар билан бир қаторда лицензия талаб-шартларининг қўпол бузилиш ҳолати деб баҳоланиб, лицензияни бекор қилишгача олиб боришини эслатмоқда.
Изоҳ (0)