Senatning qirq birinchi yalpi majlisida “Ekologiya va jamoat tartibini saqlash sohalaridagi qonunchilik takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun ko‘rib chiqildi.
Senatorlar tomonidan muhokama qilingan ushbu qonun bilan ekologiya va atrof-muhitni muhofaza qilish sohasida huquqbuzarliklar sodir etgan aybdor shaxslarni maʼmuriy javobgarlikka tortish uchun Ichki ishlar va Milliy gvardiya organlariga zarur vakolatlar berilishini nazarda tutuvchi o‘zgartish va qo‘shimchalar kiritilmoqda.
Ichki ishlar va Milliy gvardiya organlariga Maʼmuriy javobgarlik to‘g‘risidagi kodeksda belgilangan ekologiya va atrof-muhitni muhofaza qilish sohasidagi 7 ta moddada nazarda tutilgan maʼmuriy huquqbuzarliklar to‘g‘risidagi ishlar tegishliligi belgilanyapti.
Ushbu ishlarni ko‘rib chiqishga hamda jarima tariqasidagi maʼmuriy jazo qo‘llashga haqli bo‘lgan mansabdor shaxslar, shuningdek, Ichki ishlar va Milliy gvardiya organlari nomidan maʼmuriy huquqbuzarlik to‘g‘risidagi bayonnomani tuzishga haqli bo‘lgan ushbu organ tuzilmalarining mansabdor shaxslari belgilanmoqda.
Shu bilan birga Ichki ishlar va Milliy gvardiya organlari mansabdor shaxslariga ekologiya va atrof-muhitni muhofaza qilish sohasidagi baʼzi huquqbuzarliklarni sodir etgan shaxslarni maʼmuriy yo‘l bilan ushlab turish vakolati berilmoqda.
“Ekologiya, atrof muhitga yetkazilgan zarar uchun javobgarlik kuchaytirildi. Biroq javobgarlikni so‘zsiz taʼminlash uchun aniq mexanizmlarni ham belgilab berish zarur. Zero, aybdor shaxslarga nisbatan o‘z vaqtida javobgarlik choralarini qatʼiy qo‘llanilmasligi ularda qonun talablariga bepisandlikni va qonunchilikda belgilangan ‘javobgarlikning muqarrarligi’ prinsipi buzilishini ham keltirib chiqaradi”, — deydi Senat raisi Tanzila Norboyeva.
Senatorlar mazkur o‘zgartish va qo‘shimchalar atrof-muhitni muhofaza qilish sohasidagi qonunchilikning so‘zsiz ijro etilishini, shuningdek, ushbu sohadagi huquqbuzarliklar profilaktikasini samarali tashkil etishda muhim ahamiyat kasb etishini taʼkidlagan.
Shuningdek, qonunning qabul qilinishi tabiiy resurslarni, yaʼni suv obyektlariga oqova suvlarni oqizish, yer usti suvlarini, atmosfera havosini hamda atrof-muhitni chiqindilar bilan ifloslantirish holatlarini keltirib chiqaruvchi obyekt yoki subyektlarga nisbatan tezkor choralar ko‘rilishini taʼminlashga xizmat qilishi qayd etilgan. Muhokama yakunida qonun senatorlar tomonidan maʼqullangan.
Bir yil avval “Ekonazorat” axborot tizimi joriy etilgan edi. Unga ko‘ra, jismoniy shaxslar ekologiya, atrof-muhitni muhofaza qilish va tabiatdan foydalanish sohasidagi huquqbuzarlik aks etgan foto va videomateriallarni tizimga yuborishi va buning evaziga rag‘batlantirilishi ko‘zda tutilgan. Tabiat resurslari vazirligining “Daryo”ga maʼlum qilishicha, 2023-yil may o‘rtalariga qadar “Ekonazorat” axborot tizimi orqali 419 ta foto va videofaktlar kelib tushgan.
Izoh (0)