O‘zbekiston qonunchiligida 2023-yil 1-iyundan bir qator o‘zgarish va yangiliklar kuchga kirdi. Norma milliy qonunchilikda ushbu sanadan amal qiladigan asosiy o‘zgarishlar sharhini taqdim etdi.
Savdo-sotiqni tun-u kun amalga oshirish mumkin bo‘ladi
Chakana savdo va xizmat ko‘rsatish obyektlarining faoliyat ko‘rsatish vaqtiga nisbatan cheklovlar prezidentning 8-maydagi “Yangi tahrirdagi O‘zbekiston Respublikasi Konstitutsiyasini amalga oshirish bo‘yicha birinchi navbatdagi chora-tadbirlar to‘g‘risida”gi Farmoni bilan bekor qilinmoqda.
P2P hisob-fakturalar talab etilmaydi
To‘lov xizmatlarini ko‘rsatuvchi tashkilotlar jismoniy shaxslar o‘rtasida pul o‘tkazmalari amalga oshirilganda, ularga ko‘rsatilgan xizmatlar uchun elektron hisobvaraq-fakturalar taqdim etish talabi bekor qilinmoqda.
Telekommunikatsiya vositalarini ijarada joylashtirish yangi qoidalar bo‘yicha amalga oshiriladi
Jismoniy va yuridik shaxslarga mulk huquqi asosida tegishli bo‘lgan yer uchastkalari, bino va inshootlarda telekommunikatsiya vositalarini o‘rnatish shartnomasini rasmiylashtirish bo‘yicha yangi talablar kiritilmoqda.
Kreditlarni biometrik identifikatsiya orqali berish boshlanadi
Markaziy bank, vakolatli banklar Personallashtirish agentligi, Ichki ishlar vazirligi, Mahallabay ishlash va tadbirkorlikni rivojlantirish agentligi bilan birgalikda aholi va tadbirkorlik subyektlariga kredit ajratish jarayonida qarz oluvchini ID-kartadagi (biometrik pasportdagi) biometrik ma’lumotlar asosida identifikatsiya qilishni yo‘lga qo‘yishi belgilangan.
Vafot etgan harbiylar oilalariga qo‘shimcha imtiyozlar taqdim etilmoqda
Jumladan, halok bo‘lgan harbiy xizmatchining (xodimning) farzandlari maktabgacha taʼlim muassasalarida bepul tarbiyalanishi, shuningdek, professional va oliy taʼlim muassasalarida davlat granti asosida qo‘shimcha kvotalar bo‘yicha taʼlim olishi taʼminlanadi; uning ota-onalariga yiliga 2 marta temiryo‘l va havo yo‘lovchilar transportidan bepul foydalanish huquqi beriladi va boshqalar.
Qishda talafot ko‘rgan tadbirkorlik subyektlarining taqdim etilgan kredit taʼtillari tugamoqda
Muqaddam Markaziy bank va tijorat banklariga qish mavsumida talafot ko‘rgan tadbirkorlik subyektlarining kreditlari bo‘yicha 2023-yil yanvar–mart oylari uchun to‘lovlar muddatini 2023-yil 1-iyunga qadar uzaytirish topshirig‘i berilgan edi.
“Yashil sertifikatlar” tizimi joriy etiladi
Tizim mahsulotlarni ishlab chiqarishda ekologiya va atrof-muhitga taʼsirni cheklash bo‘yicha qo‘yilayotgan talablar asosida joriy etilmoqda.
Chaqaloqlarni FHDY tomonidan ro‘yxatdan o‘tkazish tibbiyot muassasalari orqali amalga oshiriladi
Toshkentda mazkur tartib yil boshidan joriy etilgan bo‘lib, 1-iyundan respublika bo‘yicha joriy etiladi.
Sud-ekspertiza tashkilotlariga berilgan bojxona imtiyozlari bekor qilinmoqda
Davlat va nodavlat sud-ekspertiza tashkilotlari 1-iyunga qadar O‘zbekistonda ishlab chiqarilmaydigan, chetdan olib kelinadigan:
- asbob-uskunalar, maxsus jihozlangan avtotransport vositalari, dasturiy taʼminotlar, reaktivlar, reagentlar va sarflash materiallari;
- ushbu tashkilotlarning faoliyatini taʼminlash uchun zarur, foydalanishda bo‘lgan asbob-uskunalarning ehtiyot qismlari bojxona to‘lovlaridan (QQS va bojxona rasmiylashtiruvi yig‘imlaridan tashqari) ozod qilingan edi.