Ilk bor sudyalik lavozimiga tayinlanish uchun Sudyalar oliy kengashi huzuridagi Sudyalar oliy maktabining Sudyalik lavozimlariga nomzodlarni tayyorlash kursida o‘qish talab etiladi. Tahsil muddati — 1 yil va davlat granti asosida amalga oshiriladi. Bu haqda Sudyalar oliy maktabi direktorining O‘quv-metodik ishlar bo‘yicha o‘rinbosari Dilshod Isroilov “Daryo” muxbiriga bergan intervyusida aytib o‘tdi.
Dilshod Isroilovning maʼlum qilishicha, ayni vaqtda Sudyalar oliy maktabiga hujjatlarni qabul qilish jarayoni davom etmoqda, jarayon 5-iyun kuni o‘z nihoyasiga yetadi.
“Kirish sinovlari bosqichma-bosqich amalga oshiriladi. Hozirgi kunda 450 nafar talabgor hujjat topshirgan, 5-iyungacha bu raqam yanada ortishi ehtimoli katta. Birinchi bosqichda talabgorlarning hujjatlarni keng ko‘lamli o‘rganiladi. Munosib topilganlari psixologik testdan o‘tadilar. O‘tgan o‘quv yilida maxsus tekshiruvlarda 752 nafar talabgordan 612 nafari psixologik testdan o‘tishga ruxsat berilgan. Psixologik testdan esa 50 nafar talabgor keyingi bosqichga o‘tmagan”, — dedi Sudyalar oliy maktabi direktori o‘rinbosari.
Uning qo‘shimcha qilishicha, barcha bosqichlar shaffof o‘tishi uchun talabgorlar haqida maʼlumotlar shifrlanadi va qatʼiy tartib asosida o‘tkaziladi.
“Talabgorlarni ovora qilmaslik maqsadida psixologik testlar viloyatlarni o‘zida olinib, shifrlangan holda Toshkent shahriga olib kelib tekshiriladi. Bunda tekshiruvchilar kimni topshirgan testini tekshirayotganini bilmaydi. Keyingi bosqichda esa ingliz tilidan Davlat test markazi tomonidan test imtihon o‘tkaziladi. Keyingi bosqichda 3 ta mavzuda erkin insho yoziladi. Bunda istovchilar inshoni qoraqalpoq yoki rus tilida yozishlariga ruxsat beriladi. Oxirida bosqichda maxsus komissiyaning suhbati o‘tkaziladi.
Yana bir jihatga alohida e’tibor berish kerak, kirish imtihonlariga oliy maktab rahbariyati u yoqda tursin, Sudyalar oliy kengashi ham aralasholmaydi. Har qanday noqonuniy harakatga qonunda belgilangan tartibda qatʼiy chora ko‘riladi”, — dedi Dilshod Isroilov.
Taʼkidlanishicha, oliy maktabda o‘qish istagini bildirganlar orasida asosan sud apparati xodimlari, yaʼni sudya yordamchilari, sud arxivi devonxona xodimlari 90 foizni tashkil etgan. Shuningdek, talabgorlar orasida prokuratura, advokatlar, adliya bo‘limlari, soliq va bojxona tizimida faoliyat yuritganlari ham mavjud.
Eslatib o‘tamiz, nizomga muvofiq Sudyalar oliy maktabiga 34 yoshga to‘lgan, kamida 7 yil yuridik ixtisoslik bo‘yicha ishlagan va yuridik yo‘nalishi bo‘yicha bakalavr diplomiga ega bo‘lgan O‘zbekiston fuqarolari topshirishi mumkin.
Joriy 2023/2024-o‘quv yilgi kvotalar soni 120 tani tashkil qilib, sud ixtisosliklari bo‘yicha 4 ta yo‘nalish bo‘yicha taqsimlanadi:
- jinoyatga 30 ta;
- fuqarolikka 30 ta;
- iqtisodiyga 20 ta;
- maʼmuriyga 16 ta;
Shuningdek, qo‘shimcha sifatida ayollarga har bir yo‘nalish bo‘yicha 3 tadan hamda Jizzax, Navoiy, Surxondaryo va Sirdaryo viloyatlariga 12 ta qo‘shimcha joy ajratilgan.
Izoh (0)