Илк бор судьялик лавозимига тайинланиш учун Судьялар олий кенгаши ҳузуридаги Судьялар олий мактабининг Судьялик лавозимларига номзодларни тайёрлаш курсида ўқиш талаб этилади. Таҳсил муддати — 1 йил ва давлат гранти асосида амалга оширилади. Бу ҳақда Судьялар олий мактаби директорининг Ўқув-методик ишлар бўйича ўринбосари Дилшод Исроилов “Дарё” мухбирига берган интервьюсида айтиб ўтди.
Дилшод Исроиловнинг маълум қилишича, айни вақтда Судьялар олий мактабига ҳужжатларни қабул қилиш жараёни давом этмоқда, жараён 5 июнь куни ўз ниҳоясига етади.
“Кириш синовлари босқичма-босқич амалга оширилади. Ҳозирги кунда 450 нафар талабгор ҳужжат топширган, 5 июнгача бу рақам янада ортиши эҳтимоли катта. Биринчи босқичда талабгорларнинг ҳужжатларни кенг кўламли ўрганилади. Муносиб топилганлари психологик тестдан ўтадилар. Ўтган ўқув йилида махсус текширувларда 752 нафар талабгордан 612 нафари психологик тестдан ўтишга рухсат берилган. Психологик тестдан эса 50 нафар талабгор кейинги босқичга ўтмаган”, — деди Судьялар олий мактаби директори ўринбосари.
Унинг қўшимча қилишича, барча босқичлар шаффоф ўтиши учун талабгорлар ҳақида маълумотлар шифрланади ва қатъий тартиб асосида ўтказилади.
“Талабгорларни овора қилмаслик мақсадида психологик тестлар вилоятларни ўзида олиниб, шифрланган ҳолда Тошкент шаҳрига олиб келиб текширилади. Бунда текширувчилар кимни топширган тестини текшираётганини билмайди. Кейинги босқичда эса инглиз тилидан Давлат тест маркази томонидан тест имтиҳон ўтказилади. Кейинги босқичда 3 та мавзуда эркин иншо ёзилади. Бунда истовчилар иншони қорақалпоқ ёки рус тилида ёзишларига рухсат берилади. Охирида босқичда махсус комиссиянинг суҳбати ўтказилади.
Яна бир жиҳатга алоҳида эътибор бериш керак, кириш имтиҳонларига олий мактаб раҳбарияти у ёқда турсин, Судьялар олий кенгаши ҳам аралашолмайди. Ҳар қандай ноқонуний ҳаракатга қонунда белгиланган тартибда қатъий чора кўрилади”, — деди Дилшод Исроилов.
Таъкидланишича, олий мактабда ўқиш истагини билдирганлар орасида асосан суд аппарати ходимлари, яъни судья ёрдамчилари, суд архиви девонхона ходимлари 90 фоизни ташкил этган. Шунингдек, талабгорлар орасида прокуратура, адвокатлар, адлия бўлимлари, солиқ ва божхона тизимида фаолият юритганлари ҳам мавжуд.
Эслатиб ўтамиз, низомга мувофиқ Судьялар олий мактабига 34 ёшга тўлган, камида 7 йил юридик ихтисослик бўйича ишлаган ва юридик йўналиши бўйича бакалавр дипломига эга бўлган Ўзбекистон фуқаролари топшириши мумкин.
Жорий 2023/2024-ўқув йилги квоталар сони 120 тани ташкил қилиб, суд ихтисосликлари бўйича 4 та йўналиш бўйича тақсимланади:
- жиноятга 30 та;
- фуқароликка 30 та;
- иқтисодийга 20 та;
- маъмурийга 16 та;
Шунингдек, қўшимча сифатида аёлларга ҳар бир йўналиш бўйича 3 тадан ҳамда Жиззах, Навоий, Сурхондарё ва Сирдарё вилоятларига 12 та қўшимча жой ажратилган.
Изоҳ (0)